Read nynorsk 2011 Job 8 Bible Online

Job 8 - nynorsk 2011 bible

Job 8

¹Då tok Bildad frå Sjuah til ords og sa:

² Kor lenge vil du tala slik med ord som ein mektig vind?

³ Trur du at Gud forvrengjer retten, at Den veldige fordreiar rettferda?

⁴ Om borna dine syndar mot han, så gjev han dei over til synda.

⁵Men om du søkjer Gud og bed Den veldige om nåde,

⁶ om du er rein og rettskaffen, så vil han vaka over deg og på nytt reisa din rettferds bustad.

⁷ Du byrja smått, men slutten blir stor.

⁸ Spør tidlegare slekter, hald fast på det fedrane fann.

⁹ For vi er frå i går, vi veit ingen ting. Som ein skugge er dagane våre på jorda.

¹⁰Men fedrane vil læra deg og tala til deg, føra fram ord frå hjartet.

¹¹Veks vel papyrus der det ikkje er myrlendt, blir sivet stort der det ikkje er vatn?

¹²Medan det står grønt og uskore, visnar det, før alt anna gras.

¹³ Slik går det med alle som gløymer Gud. Håpet går under for den som er ugudeleg.

¹⁴Hans trygge ro heng i tynne trådar, han set si lit til spindelvev.

¹⁵Han støttar seg til eige hus, men det held ikkje; han klamrar seg til det, men det blir ikkje ståande.

¹⁶Frodig står han i sola, breier greinene ut over hagen sin.

¹⁷Men røtene hans slyngjer seg inn i ei steinrøys, dei kikkar fram mellom steinar.

¹⁸ Blir han riven vekk frå staden sin, kjenner ikkje staden han: «Eg har aldri sett deg.»

¹⁹ Slik er gleda på hans veg, før den neste gror opp av støvet.

²⁰Sjå, Gud avviser ikkje den fromme og gjev ikkje styrke til ugjerningsmenn.

²¹ Han vil på nytt fylla din munn med lått, leggja jubelrop på leppene.

²² Dei som hatar deg, må kle seg i skam, telta til dei lovlause blir borte.