Read nynorsk 2011 Salmane 10 Bible Online

Salmane 10 - nynorsk 2011 bible

Salmane 10

¹ [19] Kvifor, HERRE, er du så langt borte, kvifor løyner du deg når folk er i naud?

²I sitt hovmod jagar dei lovlause den som er hjelpelaus, men dei blir fanga av sine eigne listige knep.

³Den lovlause skryter av alt han trår etter, den griske forbannar, ja, foraktar HERREN.

⁴ Den lovlause set nasen i vêret. «Han krev meg ikkje til rekneskap! Det finst ingen Gud», er alt han tenkjer.

⁵Likevel lukkast han alltid med det han gjer. Det du har fastsett, er for høgt og fjernt for han. Han fnyser forakteleg av alle som står imot han.

⁶Han seier i sitt hjarte: «Eg skal ikkje vakla. Så lenge slekt følgjer slekt, skal ulukka aldri nå meg.»

⁷ Munnen hans er full av forbanning, av svik og vald, under tunga gøymer han skade og urett.

⁸Han ligg i bakhald i landsbyane, i løynd drep han den skuldlause. Auga hans speidar etter den som er verjelaus.

⁹ Han ligg på lur som ei løve i krattet, der ingen ser han, han ligg på lur så han kan gripa den som er hjelpelaus. Han grip den hjelpelause og dreg han inn i garnet.

¹⁰Han dukkar seg ned, han krøkjer seg saman, og den verjelause fell for hans overmakt.

¹¹ «Gud gløymer», seier han til seg sjølv. «Gud løyner sitt andlet og ser aldri.»

¹² Reis deg, HERRE! Gud, lyft di hand! Gløym ikkje den som er hjelpelaus!

¹³Kvifor skal den lovlause forakta Gud og seia i sitt hjarte: «Du krev ikkje til rekneskap»?

¹⁴ Du ser både ulukke og sorg, du ser det og tek det i di hand. Den verjelause kan gje seg over til deg, og den farlause — du er hans hjelpar.

¹⁵ Bryt armen på den som er urettferdig og vond! Krev han til rekneskap for hans urett så han ikkje må finnast meir!

¹⁶ HERREN er konge til evig tid, framande folk skal ryddast ut av hans land.

¹⁷Det dei hjelpelause lengtar etter, høyrer du, HERRE, du stør deira hjarte, du vender øyra til.

¹⁸Du hjelper dei farlause og undertrykte til deira rett. Menneske skal ikkje lenger bli drivne ut av landet i frykt.