Read nynorsk 2011 Salmane 101 Bible Online

Salmane 101 - nynorsk 2011 bible

Salmane 101

¹Av David. Ein salme. Eg vil syngja om miskunn og rett, HERRE, for deg vil eg syngja og spela.

² Eg vil læra meg den fullkomne vegen. Når vil du koma til meg? Med heilt hjarte vil eg vandra i mitt hus.

³Vondskap vil eg ikkje ha for auge, urett hatar eg, slikt held eg meg borte frå.

⁴Svikefullt hjarte skal vika frå meg. Eg vil ikkje vita av det vonde.

⁵ Den som baktalar sin neste, vil eg gjera ende på. Stolte auge og eit hovmodig hjarte kan eg ikkje tola.

⁶Auga mine ser til dei trufaste i landet, dei får bu hos meg. Den som går den fullkomne vegen, skal tena meg.

⁷ Den som fer med svik, får ikkje bu i mitt hus. Den som talar løgn, kan ikkje bli ståande for mine auge.

⁸ Kvar morgon gjer eg ende på dei urettferdige i landet. Alle som gjer urett, ryddar eg ut av HERRENS by.