Read nynorsk 2011 Salmane 103 Bible Online

Salmane 103 - nynorsk 2011 bible

Salmane 103

¹Av David. Velsign HERREN, mi sjel! Alt som i meg er, velsign hans heilage namn.

² Velsign HERREN, mi sjel! Gløym ikkje alt det gode han gjer.

³Han tilgjev all di skuld og lækjer alle dine sjukdomar.

⁴ Han friar ditt liv frå grava og kronar deg med miskunn og kjærleik.

⁵ Han mettar ditt liv med det gode, du blir ung att som ørna.

⁶ HERREN skaper rettferd, han lèt alle undertrykte få sin rett.

⁷ [141] Han kunngjorde sine vegar for Moses, sine gjerningar for Israels folk.

⁸ Mild og nådig er HERREN, sein til vreide og rik på miskunn.

⁹ Han kjem ikkje med klagemål for alltid og er ikkje for evig harm.

¹⁰ Han gjer ikkje gjengjeld for våre synder, han løner oss ikkje etter vår skuld.

¹¹ Så høg som himmelen er over jorda, så veldig er hans miskunn over dei som fryktar han.

¹²Så langt som aust er frå vest, tek han syndene våre bort frå oss.

¹³Som ein far er mild med sine born, er HERREN mild med dei som fryktar han.

¹⁴ For han veit korleis vi er skapte, han kjem i hug at vi er støv.

¹⁵ Dagane mennesket får, er som gras, det blømer som blomen på marka.

¹⁶ Når vinden fer over han, er han borte, staden han stod på, veit ikkje lenger av han.

¹⁷ Men HERRENS miskunn er frå æve til æve over dei som fryktar han. Hans rettferd når til barneborn,

¹⁸ til dei som held hans pakt og kjem i hug hans bod, så dei følgjer dei.

¹⁹ HERREN har reist si trone i himmelen, han rår som konge over alt.

²⁰ Velsign HERREN, de hans englar, de sterke heltar som lydige set hans ord i verk.

²¹Velsign HERREN, alle hans hærar, de tenarar som set hans vilje i verk.

²²Velsign HERREN, alle hans skapningar, overalt der han rår. Velsign HERREN, mi sjel!