Read nynorsk 2011 Salmane 104 Bible Online

Salmane 104 - nynorsk 2011 bible

Salmane 104

¹ Velsign HERREN, mi sjel! Stor er du, HERRE, min Gud! Du har kledd deg i høgd og herlegdom.

² Du sveiper lyset om deg som ei kappe, du spenner himmelen ut som ein teltduk.

³ Han tømrar sine høge salar i vatnet. Han gjer skyer til si vogn og fer fram på vindens venger.

⁴ Han gjer vindane til sine englar og logande eld til sine tenarar.

⁵ Han grunnla jorda på hennar søyler, aldri i æve skal ho rokkast.

⁶ Djupet dekte henne som ei kappe, vatnet stod over fjella.

⁷Då du truga, rømde det, det flykta for lyden av di tore,

⁸over fjell og ned i dalar, til staden du hadde fastsett.

⁹ Du sette ei grense det ikkje går over, det skal aldri meir dekkja jorda.

¹⁰ Du lèt kjelder strøyma fram i dalane så bekker renn mellom fjella.

¹¹Dei gjev drikke til alle dyr på marka, ville esel får sløkkja tørsten.

¹²Der finn fuglane under himmelen bustad, dei syng mellom greinene.

¹³ Han vatnar fjella frå sin høge sal. Jorda blir metta med frukta av di gjerning.

¹⁴ Du lèt graset spira fram for feet og vokstrar til nytte for mennesket. Du lèt brødet koma frå jorda,

¹⁵vinen gjev mennesket glede. Du lèt andletet skina av olje, brødet gjev mennesket styrke.

¹⁶ HERRENS tre får sløkkja tørsten, sedrane på Libanon, som han har planta.

¹⁷Der byggjer fuglane reir, i sypressen har storken sitt hus.

¹⁸Dei høge fjella har steinbukken fått, berga gjev grevlingen livd.

¹⁹ Han skapte månen til å syna tidene, og sola, som veit når ho skal gå ned.

²⁰Du sender mørker, og det blir natt. Då myldrar dei fram, alle dyr i skogen.

²¹ Unge løver brøler etter rov, dei krev si føde frå Gud.

²²Sola står opp, dei vender attende og legg seg i sine hòler.

²³Då går mennesket ut til si gjerning og arbeider til kvelden kjem.

²⁴ HERRE, kor mange dine gjerningar er! Og alle har du gjort med visdom, jorda er full av det du ber fram.

²⁵Her er havet, stort og vidt, med ein vrimmel av dyr, små og store, utan tal.

²⁶ [142] Der stemner skipa fram, der er Leviatan, som du har skapt til å leika med.

²⁷ Alle ventar på deg, at du skal gje dei mat i rett tid.

²⁸Du gjev, og dei sankar, du opnar handa, og dei blir metta med det gode.

²⁹ Du løyner andletet, og dei blir gripne av redsle, du tek livsanden frå dei, då døyr dei og blir til støv att.

³⁰ Du sender ut din Ande, og dei blir skapte, du gjer jorda ny.

³¹ Måtte HERRENS ære vara evig og HERREN gleda seg over sine gjerningar!

³² Han ser på jorda, og ho skjelv, han rører fjella, og dei står i røyk.

³³ Eg vil syngja for HERREN heile mitt liv, spela for min Gud så lenge eg er til.

³⁴ Måtte orda mine gjera han glad! Eg vil gleda meg i HERREN.

³⁵ [143] Lat syndarane kverva frå jorda og ingen urettferdige finnast meir! Velsign HERREN, mi sjel! Halleluja!