Read nynorsk 2011 Salmane 105 Bible Online

Salmane 105 - nynorsk 2011 bible

Salmane 105

¹ Pris HERREN, kall på hans namn, gjer gjerningane hans kjende blant folka!

² Syng for han og spel for han, syng om alle hans under!

³Ver stolte over hans heilage namn! Gled dykk i hjartet, de som søkjer HERREN.

⁴ Spør etter HERREN og hans makt, søk alltid hans andlet!

⁵Kom i hug det underfulle han har gjort, teikna hans og lovene frå hans munn,

⁶du ætt av Abraham, hans tenar, Jakobs søner, som han har valt ut.

⁷Han er HERREN vår Gud, lovene hans gjeld over heile jorda.

⁸ Han kjem i hug si pakt til evig tid, ordet han gav, i tusen slektsledd,

⁹ pakta han gjorde med Abraham, og eiden han svor til Isak.

¹⁰ Dette sette han opp som ei forskrift for Jakob, som ei evig pakt for Israel.

¹¹Han sa: «Eg gjev deg landet Kanaan til arv og eige.»

¹²Der var dei ein liten flokk, få og framande.

¹³ Dei vandra frå folk til folk, frå det eine riket til det andre.

¹⁴ Men han lét ingen få undertrykkja dei, han refsa kongar for deira skuld:

¹⁵«Rør ikkje dei som eg har salva, gjer ikkje vondt mot mine profetar!»

¹⁶ [144] Han kalla hungersnaud over landet og braut sund kvar brødstav.

¹⁷ Han sende ein mann føre dei, Josef vart seld som slave.

¹⁸ Dei tvinga føtene hans i lenkjer, jern vart lagt om halsen,

¹⁹ heilt til det han sa, vart oppfylt og HERRENS ord gav han rett.

²⁰ Kongen sende bod og sette han fri, han som herska over folka, sleppte han laus.

²¹ Han sette han til herre over sitt hus, til herskar over all sin eigedom.

²² Han skulle rettleia kongens stormenn etter sin vilje og gje hans eldste sin visdom.

²³ [145] Så kom Israel til Egypt, Jakob vart innflyttar i Hams land.

²⁴ Han gjorde folket sitt fruktbart, meir talrikt enn fienden.

²⁵Han vende deira hug så dei hata hans folk og fór med svik mot hans tenarar.

²⁶ Han sende Moses, sin tenar, og Aron, som han hadde valt ut.

²⁷ Dei gjorde hans under mellom dei og teikn i Hams land.

²⁸ Han sende mørker, og det vart mørkt. Hadde dei ikkje trassa hans ord?

²⁹ Han gjorde vatnet til blod og drap fisken.

³⁰ Det krydde av frosk i landet, jamvel i kongens eigne rom.

³¹ Då han gav bod, kom det lus og insekt i heile landet.

³² Han gjorde regnet til hagl og sende flammande eld i landet.

³³Han slo vinstokkane og fikentrea deira ned, han knuste kvart tre i landet.

³⁴ Då han gav bod, kom det grashopper og sirissar utan tal.

³⁵Dei åt opp alt som voks i landet, dei åt opp grøda på marka.

³⁶ Gud slo alle førstefødde i landet, førstegrøda av deira kraft.

³⁷ Så førte han dei ut med sølv og gull, ingen i stammane hans snubla.

³⁸Det var glede i Egypt då dei drog ut, landet var slege av redsle for dei.

³⁹ Han breidde ut ei sky til å dekkja dei og ein eld til å lysa om natta.

⁴⁰ Då dei bad, sende han vaktlar og metta dei med himmelbrød.

⁴¹ Han opna berget, og vatnet strøymde fram, det rann som ei elv i det tørre landet.

⁴² For han kom i hug sitt heilage ord til Abraham, sin tenar.

⁴³Han lét folket sitt dra ut med glede, sine utvalde med jubelrop.

⁴⁴ Han gav dei land som andre folk eigde, dei overtok det andre hadde streva for,

⁴⁵ så dei skulle halda hans forskrifter og ta vare på hans lover. Halleluja!