Read nynorsk 2011 Salmane 106 Bible Online

Salmane 106 - nynorsk 2011 bible

Salmane 106

¹ Halleluja! Takk HERREN, for han er god, evig varer hans miskunn.

² Kven kan nemna alle HERRENS storverk, fortelja om det herlege han har gjort?

³Sæle er dei som tek vare på retten og alltid fremjar rettferd.

⁴ HERRE, kom meg i hug i din nåde mot folket ditt, kom til meg med di frelse.

⁵Då kan eg sjå kor godt det går dine utvalde, få del i gleda til folket ditt og prisa meg lukkeleg saman med dine.

⁶ Vi har synda slik fedrane våre gjorde, vi har bore oss ille åt og gjort urett.

⁷ Fedrane våre i Egypt tenkte ikkje på dine under, dei kom ikkje i hug di store miskunn. Ved sjøen var dei trassige, ved Sivsjøen.

⁸Men han frelste dei for sitt namn skuld så dei skulle kjenna hans kraft.

⁹ Han truga Sivsjøen, og sjøen tørka inn, han førte dei gjennom djupet som gjennom ein ørken.

¹⁰Han frelste dei frå hatarhand, frå fiendehand fria han dei.

¹¹Motstandarane vart dekte av vatnet, ingen kom frå det med livet.

¹² Då stola dei på hans ord og song lovsong for han.

¹³Snart gløymde dei det han hadde gjort, og venta ikkje meir på råd frå han.

¹⁴ Dei vart griske og grådige i ørkenen, i øydemarka sette dei Gud på prøve.

¹⁵ Då gav han dei det dei kravde, men sende sjukdom som tærte dei bort.

¹⁶ Dei vart misunnelege på Moses i leiren og på Aron, HERRENS heilage.

¹⁷ Jorda opna seg og slukte Datan, ho lukka seg over Abirams følgje.

¹⁸Då braut det ut eld blant dei, og logen brende opp dei skuldige.

¹⁹ Ved Horeb laga dei ein kalv og bøygde seg for det støypte biletet.

²⁰ Dei bytte bort si ære mot eit bilete av ein okse som et gras.

²¹ Dei gløymde Gud som frelste dei, som gjorde storverk i Egypt.

²²Han gjorde under i Hams land og skremmande gjerningar ved Sivsjøen.

²³ Han sa at han ville rydda dei ut, men Moses, hans utvalde, la seg imellom og stagga hans øydeleggjande harme.

²⁴ Dei vraka det herlege landet og stola ikkje på hans ord.

²⁵Dei murra i telta og høyrde ikkje på HERRENS røyst.

²⁶ Då lyfte han handa mot dei og svor å slå dei ned der i ørkenen,

²⁷ å spreia deira ætt mellom folka og strø dei ut i landa.

²⁸ [146] Dei slutta seg til Baal-Peor og heldt offermåltid for døde.

²⁹Dei gjorde han rasande med sine gjerningar, og pest braut ut imellom dei.

³⁰ [147] Då stod Pinhas fram og felte dom, og pesten stansa.

³¹Han vart rekna som rettferdig frå slekt til slekt i alle tider.

³² Dei gjorde han harm ved Meriba-kjelda, og Moses måtte lida for deira skuld.

³³Dei gjorde han beisk så han tala utan å tenkja.

³⁴ Dei rydda ikkje ut folka slik HERREN hadde sagt,

³⁵men blanda seg med andre folkeslag og lærte å gjera som dei.

³⁶ Dei dyrka gudebilete, det vart ei snare for dei.

³⁷ Dei ofra sine søner og døtrer til dei vonde åndene.

³⁸Dei auste ut uskuldig blod, blodet av søner og døtrer som dei ofra til gudebileta i Kanaan. Og landet vart vanhelga av blodet.

³⁹ Dei vart ureine gjennom sine handlingar, med alt dei gjorde, dreiv dei hor.

⁴⁰Då flamma HERRENS vreide opp mot folket, han hadde avsky for dei som høyrde han til.

⁴¹Han gav dei i hendene på andre folkeslag, dei som hata dei, vart deira herrar.

⁴²Dei vart undertrykte av fiendar og måtte bøya seg under deira hand.

⁴³Mange gonger fria han dei ut, likevel trassa dei han med sine planar og gjekk under i synd.

⁴⁴Men han såg til dei i nauda då han høyrde dei ropa.

⁴⁵ Han kom i hug si pakt med dei og viste medynk i sin store kjærleik.

⁴⁶Så lét han dei møta miskunn hos alle som heldt dei som fangar.

⁴⁷Frels oss, HERRE, vår Gud, sank oss inn frå folka så vi kan prisa ditt heilage namn og uredde lovsyngja deg.

⁴⁸ Velsigna er HERREN, Israels Gud, frå æve til æve! Og heile folket skal seia: Amen! Halleluja!