Read nynorsk 2011 Salmane 115 Bible Online

Salmane 115 - nynorsk 2011 bible

Salmane 115

¹Ikkje oss, HERRE, ikkje oss, gjev heller ditt namn ære, du som er kjærleg og trufast.

² Kvifor skal folka seia: «Kvar er deira Gud?»

³ Vår Gud er i himmelen, alt han vil, det gjer han.

⁴ Gudebileta deira er av sølv og gull, menneskehender har laga dei.

⁵Dei har munn, men kan ikkje tala, dei har auge, men kan ikkje sjå.

⁶Dei har øyre, men kan ikkje høyra, dei har nase, men kan ikkje lukta.

⁷Dei har hender, men kan ikkje føla, dei har føter, men kan ikkje gå, dei har ikkje lyd i strupen.

⁸ Slik blir òg dei som lagar dei, og alle som set si lit til dei.

⁹ Stol på HERREN, Israel! Han er deira hjelp og skjold.

¹⁰ [155] Stol på HERREN, Arons hus! Han er deira hjelp og skjold.

¹¹Stol på HERREN, de som fryktar han! Han er deira hjelp og skjold.

¹² HERREN hugsar på oss, han velsignar. Han velsignar Israels hus, han velsignar Arons hus.

¹³Han velsignar dei som fryktar HERREN, dei små og dei store.

¹⁴ Måtte HERREN la dykk auka i tal, både de og borna dykkar!

¹⁵De er velsigna av HERREN, han som skapte himmel og jord.

¹⁶ Himmelen er HERRENS himmel, men jorda gav han til mennesket.

¹⁷ Dei døde prisar ikkje HERREN, alle dei som går ned til det stille landet.

¹⁸ Men vi velsignar HERREN frå no og til evig tid. Halleluja!