Read nynorsk 2011 Salmane 118 Bible Online

Salmane 118 - nynorsk 2011 bible

Salmane 118

¹ Takk HERREN, for han er god, evig varer hans miskunn.

² Israel skal seia: Evig varer hans miskunn.

³ [157] Arons hus skal seia: Evig varer hans miskunn.

⁴Dei som fryktar HERREN, skal seia: Evig varer hans miskunn.

⁵ Eg var i trengsle og ropa til HERREN, han svara og førte meg ut i ope land.

⁶ HERREN er med meg, eg er ikkje redd. Kva kan menneske gjera meg?

⁷ HERREN er med meg, han hjelper meg, eg kan sjå på dei som hatar meg.

⁸ Det er betre å søkja tilflukt hos HERREN enn å stola på menneske.

⁹Det er betre å søkja tilflukt hos HERREN enn å stola på fyrstar.

¹⁰ Alle folkeslag omringa meg, i HERRENS namn slo eg dei tilbake.

¹¹Dei var omkring meg på alle kantar, i HERRENS namn slo eg dei tilbake.

¹²Dei var omkring meg som bier. Dei slokna som eld i klunger, i HERRENS namn slo eg dei tilbake.

¹³Dei pressa meg hardt, eg heldt på å falla, men HERREN hjelpte meg.

¹⁴ HERREN er min styrke og min song, han har vorte mi frelse.

¹⁵Høyr, det er jubel og sigersrop i teltet til dei rettferdige! HERRENS høgre hand gjer storverk,

¹⁶ HERRENS høgre hand lyfter opp. HERRENS høgre hand gjer storverk.

¹⁷ Eg skal ikkje døy, men leva og fortelja om HERRENS gjerningar.

¹⁸Hardt har HERREN tukta meg, men han overgav meg ikkje til døden.

¹⁹ Lat rettferds portar opp for meg, eg vil gå inn og prisa HERREN!

²⁰Dette er HERRENS port, her går dei rettferdige inn.

²¹Eg prisar deg fordi du svara meg, du vart mi frelse.

²² Steinen som bygningsmennene vraka, har vorte hjørnestein.

²³Dette er HERRENS eige verk, underfullt er det i våre auge.

²⁴ Dette er dagen som HERREN har gjort; lat oss jubla og gleda oss no!

²⁵ HERRE, frels! HERRE, lat det lukkast!

²⁶ Velsigna er han som kjem i HERRENS namn! Vi velsignar dykk frå HERRENS hus.

²⁷ [158] HERREN er Gud, han lyser for oss. Bind festofferet til altarhorna med tau!

²⁸ Du er min Gud, eg takkar deg, min Gud, eg opphøgjer deg.

²⁹ Takk HERREN, for han er god, evig varer hans miskunn.