Read nynorsk 2011 Salmane 135 Bible Online

Salmane 135 - nynorsk 2011 bible

Salmane 135

¹Halleluja! Lovsyng HERRENS namn, syng lovsong, HERRENS tenarar,

²de som står i HERRENS hus, i føregardane til vår Guds hus!

³ Pris HERREN, for HERREN er god, lovsyng hans namn, for det er herleg!

⁴ HERREN har valt ut Jakob, gjort Israel til sin eigedom.

⁵ Eg veit at HERREN er stor, vår Herre er større enn alle gudar.

⁶ Alt HERREN vil, det gjer han, i himmelen og på jorda, i havet og i alle djup.

⁷ Han lèt skyer gå opp frå enden av jorda, han lagar lyn og regn og lèt vinden sleppa ut frå sine forrådskammer.

⁸ Han slo dei førstefødde i Egypt, både menneske og dyr.

⁹ Han sende teikn og under mot deg, Egypt, mot farao og alle hans tenarar.

¹⁰ Han slo mange folkeslag og drap mektige kongar:

¹¹amorittkongen Sihon, kong Og i Basan, og alle kongerike i Kanaan.

¹²Han gav landet deira til eigedom, til eigedom for Israel, sitt folk.

¹³ HERREN er ditt namn til evig tid, HERREN skal du kallast frå slekt til slekt.

¹⁴ For HERREN vil skaffa folket sitt rett og ha medkjensle med sine tenarar.

¹⁵ Gudebileta til folka er sølv og gull, menneskehender har laga dei.

¹⁶Dei har munn, men kan ikkje tala, dei har auge, men kan ikkje sjå.

¹⁷Dei har øyre, men kan ikkje høyra, det er ikkje ande i deira munn.

¹⁸Slik blir også dei som lagar dei, og alle som set si lit til dei.

¹⁹ [174] Velsign HERREN, Israels hus! Velsign HERREN, Arons hus!

²⁰ [175] Velsign HERREN, Levis hus! Velsign HERREN, de som fryktar han.

²¹Velsigna er HERREN frå Sion, han som bur i Jerusalem. Halleluja!