Read nynorsk 2011 Salmane 139 Bible Online

Salmane 139 - nynorsk 2011 bible

Salmane 139

¹Til korleiaren. Av David. Ein salme. HERRE, du ransakar meg og du veit —

² du veit om eg sit eller står, på lang avstand kjenner du mine tankar.

³Om eg går eller ligg, ser du det, du kjenner alle mine vegar.

⁴Før eg har eit ord på tunga, HERRE, kjenner du det fullt ut.

⁵Bakfrå og framanfrå omgjev du meg, du har lagt di hand på meg.

⁶Det er eit under eg ikkje skjønar, det er så høgt at eg ikkje kan fatta det.

⁷ [178] Kvar skulle eg gå frå din pust, kvar kunne eg rømma frå ditt andlet?

⁸ Stig eg opp til himmelen, er du der, legg eg meg i dødsriket, er du der òg.

⁹ [179] Tek eg soloppgangens venger og slår meg ned der havet endar,

¹⁰då fører di hand meg jamvel der, di høgre hand held meg fast.

¹¹ Eg kan seia: «Lat mørkret løyna meg og lyset omkring meg bli natt.»

¹²Men mørkret er ikkje mørkt for deg, natta er lys som dagen, mørkret er som lyset.

¹³ [180] For du har skapt mine nyrer, du har vove meg i mors liv.

¹⁴Eg takkar deg for at eg er så underfullt laga. Underfulle er dine verk, det veit eg godt.

¹⁵ [181] Knoklane mine var ikkje skjulte for deg då eg vart laga i løynd og voven djupt i jorda.

¹⁶Auga dine såg meg då eg var eit foster. Alle dagar er skrivne opp i di bok, dei fekk form før éin av dei var komen.

¹⁷ Dine tankar, Gud, er dyrebare for meg, summen av dei er ufatteleg!

¹⁸Tel eg dei, er dei tallause som sand, blir eg ferdig, er eg enno hos deg.

¹⁹Gud, om du ville drepa den lovlause, om drapsmennene veik frå meg!

²⁰Dei talar svikefullt om deg, fiendane dine sver falskt.

²¹ HERRE, eg hatar dei som hatar deg, og avskyr dei som står deg imot!

²²Eg hatar dei med eit grenselaust hat, dei har vorte mine fiendar.

²³Ransak meg, Gud, og kjenn mitt hjarte, prøv meg og kjenn mine tankar!

²⁴ Sjå om eg følgjer avgudsveg, og lei meg på den evige vegen!