Read nynorsk 2011 Salmane 140 Bible Online

Salmane 140 - nynorsk 2011 bible

Salmane 140

¹Til korleiaren. Ein salme av David.

²Fri meg, HERRE, frå vonde menneske, vern meg mot valdsmenn,

³dei som tenkjer ut vonde planar i hjartet og dagleg eggjar til strid.

⁴ Dei gjer tunga kvass som slangen, under leppene har dei ormegift. Sela

⁵Vakta meg, HERRE, for handa til lovlause, vern meg mot valdsmenn som vil setja krokfot.

⁶ Dei stolte set snarer, attmed stigen spenner dei snorer og nett, dei set feller for meg. Sela

⁷ Eg seier til HERREN: Du er min Gud, HERRE, vend øyret til mitt rop om nåde!

⁸ GUD Herre, min sterke frelsar, du vernar hovudet mitt i kamp.

⁹ HERRE, gjev ikkje dei urettferdige det dei ønskjer, lat ikkje planane deira lukkast! Sela

¹⁰ Dei som samlar seg rundt meg, lyfter hovudet. Lat uretten dei har på leppene, dyngja dei ned!

¹¹ Lat gloande kol regna over dei, lat dei falla i djupe groper så dei ikkje reiser seg meir.

¹²Lat ikkje vonde tunger bli verande i landet. Lat ulukke jaga valdsmannen og slå han ned.

¹³ Eg veit at HERREN fører sak for hjelpelause og skaper rett for fattige.

¹⁴ Dei rettferdige prisar ditt namn, dei rettvise får bu hos deg.