Read nynorsk 2011 Salmane 143 Bible Online

Salmane 143 - nynorsk 2011 bible

Salmane 143

¹Ein salme av David. HERRE, høyr mi bøn, vend øyret til mitt rop om nåde! Svar meg, du som er trufast og rettferdig.

² Gå ikkje i rette med din tenar. For ingen som lever, er rettferdig for deg.

³ Fienden har jaga meg, slege meg til jorda. Han har sett meg i stummande mørker, lik dei som er døde for lenge sidan.

⁴Livsånda slokna i meg, hjartet vart lamma av skrekk.

⁵ Eg kjem gamle dagar i hug, eg tenkjer på heile ditt verk, grundar på det dine hender har gjort.

⁶ Eg retter ut hendene mine til deg, lengtar etter deg lik tørstande jord. Sela

⁷ Skund deg og svar meg, HERRE, mi ånd går til grunne. Løyn ikkje andletet for meg, elles blir eg lik dei som går i grav.

⁸ Lat meg høyra om di miskunn om morgonen, eg set mi lit til deg! Lær meg den vegen eg skal gå, for eg lyfter mi sjel til deg.

⁹Fri meg frå mine fiendar, HERRE! Hos deg søkjer eg ly.

¹⁰ Lær meg å gjera din vilje, for du er min Gud! Lat din gode Ande leia meg på jamn grunn.

¹¹For ditt namn skuld, HERRE, hald meg i live! Du som er rettferdig, før meg ut av trengsla!

¹²Du som viser miskunn, rydd ut mine fiendar og gjer ende på alle som står imot meg! For eg er din tenar.