Read nynorsk 2011 Salmane 144 Bible Online

Salmane 144 - nynorsk 2011 bible

Salmane 144

¹Av David. Velsigna er HERREN, mitt berg, han som lærer opp hendene mine til strid og fingrane til krig.

²Han er mi miskunn, mi borg og mitt vern, han er min utfriar og mitt skjold. Eg søkjer tilflukt hos han, han legg folket mitt under meg!

³ HERRE, kva er vel eit menneske, sidan du vil kjenna det, eit menneskebarn, sidan du tenkjer på det?

⁴ Mennesket liknar ein pust, våre dagar er som ein flyktande skugge.

⁵ HERRE, bøy din himmel og stig ned, rør ved fjella så det ryk av dei!

⁶Lat lynet blinka og sprei dei! Skyt pilene dine og skrem dei!

⁷ [184] Rett ut handa frå det høge, fri meg og berg meg frå veldige vatn, frå handa til framande.

⁸Med munnen talar dei tomme ord, med høgre handa opplyft sver dei falskt.

⁹ Gud, eg vil syngja ein ny song og spela for deg på tistrengja harpe.

¹⁰Du gjev kongar siger og friar sin tenar David frå det vonde sverdet.

¹¹Fri meg og berg meg frå handa til framande. Med munnen talar dei tomme ord, med høgre handa opplyft sver dei falskt.

¹²Alt som unge liknar sønene våre høgvaksne planter. Døtrene er som beresøyler skorne ut for eit palass.

¹³Då blir forrådskammera fulle, dei bognar av alle slag mat. Sauene våre ute i marka aukar til tusen, ja, mange tusen.

¹⁴ [185] Då blir kyrne våre feite. Ingen bryt ut, og ingen blir borte. Inga klage lyder på torga.

¹⁵ Sælt er det folket som har det slik, sælt er det folket som har HERREN til Gud!