Read nynorsk 2011 Salmane 146 Bible Online

Salmane 146 - nynorsk 2011 bible

Salmane 146

¹ Halleluja! Lovsyng HERREN, mi sjel!

² Eg vil lovsyngja HERREN heile mitt liv, syngja og spela for min Gud så lenge eg er til.

³ Stol ikkje på fyrstar, menneske som ikkje kan hjelpa.

⁴ Dei andar ut og blir til jord att, den dagen fell planane i grus.

⁵ Sæl er den som har Jakobs Gud til hjelpar og set si von til HERREN sin Gud.

⁶ Han skapte himmel og jord, havet og alt som er i dei, han er trufast til evig tid.

⁷ Han hjelper dei undertrykte til deira rett, han gjev mat til dei som svelt. HERREN set dei bundne fri.

⁸ HERREN gjev dei blinde syn. HERREN reiser dei nedbøygde opp. HERREN elskar dei rettferdige.

⁹ HERREN vernar innflyttarar. Han held enkjer og farlause oppe, men gjer vegen kroket for dei som gjer urett.

¹⁰ HERREN er konge til evig tid, din Gud, Sion, frå slekt til slekt. Halleluja!