Read nynorsk 2011 Salmane 147 Bible Online

Salmane 147 - nynorsk 2011 bible

Salmane 147

¹ Halleluja! Det er godt å spela for vår Gud, det er herleg, det er rett å syngja lovsong.

² HERREN byggjer Jerusalem og samlar Israels spreidde folk.

³ Han lækjer dei som har eit sundbrote hjarte, og bind om såra deira.

⁴ Han veit kor mange stjernene er, og gjev alle namn.

⁵ Vår Herre er stor og rik på kraft, hans forstand er utan grenser.

⁶ HERREN held dei hjelpelause oppe, men bøyer dei urettferdige til jorda.

⁷Syng lovsong for HERREN, spel på lyre for vår Gud.

⁸ Han dekkjer himmelen med skyer, syter for regn til jorda og lèt graset spira på fjella.

⁹ Han gjev føde til dyra, til ramnungane som ropar.

¹⁰ Han bryr seg ikkje om hestens kraft og gleder seg ikkje over mannens musklar.

¹¹ HERREN gleder seg over dei som fryktar han og ventar på hans miskunn.

¹²Syng HERRENS pris, Jerusalem, Sion, lovsyng din Gud!

¹³Han gjer portbommane dine sterke og velsignar borna i byen.

¹⁴ Han gjev fred i landet, han mettar deg med det beste kveitekornet.

¹⁵ Han sender sin bodskap til jorda, snøgt spring hans ord.

¹⁶ Han lèt snøen falla som ull, han strør ut rim som oske.

¹⁷Han kastar hagl som smular, kven kan stå seg mot hans kulde?

¹⁸Så sender han sitt ord, og alt smeltar, han pustar, og vatnet strøymer.

¹⁹ Han kunngjorde sitt ord for Jakob, sine forskrifter og lover for Israel.

²⁰Slik gjorde han ikkje for noko anna folk, dei kjenner ikkje hans lover. Halleluja!