Read nynorsk 2011 Salmane 17 Bible Online

Salmane 17 - nynorsk 2011 bible

Salmane 17

¹Ei bøn av David. Høyr, HERRE, lat mi rettferd tala, lytt til mi bøn, høyr når eg ropar, leppene mine er utan svik.

²Frå deg må retten min koma, dine auge ser jo kva som er rett!

³ Prøv mitt hjarte, gransk det om natta, prøv meg med eld! Du finn ikkje noko skammeleg hos meg. Min munn syndar ikkje.

⁴Kva menneska enn gjorde, vakta eg meg for vegen valdsmenn går, etter ditt ord.

⁵ Stødig gjekk eg i dine spor, føtene vakla ikkje.

⁶Gud, eg ropar til deg, du som svarar. Vend øyret til meg og høyr mine ord!

⁷Vis di underfulle miskunn! Du frelser dei som flyr frå fiendar og søkjer tilflukt ved di høgre hand.

⁸ Vakta meg som din augnestein, gøym meg i skuggen av dine venger

⁹for lovlause som plyndrar meg, for dødsfiendar som kringset meg.

¹⁰Sitt harde hjarte har dei late att, med munnen talar dei hovmodige ord.

¹¹No omringar dei oss kvar vi går, dei tenkjer å slå meg til jorda.

¹² Han liknar ei rovgrisk løve, ei ungløve som ligg på lur.

¹³ Reis deg, HERRE! Gå imot han og tving han i kne! Fri meg frå den lovlause med ditt sverd,

¹⁴ HERRE, fri meg frå menneske med di hand, frå menneske i verda som har fått si løn i livet. Fyll magen deira med det du har tiltenkt dei, så sønene blir mette og lèt resten gå til sine born!

¹⁵ Men frikjend skal eg få sjå ditt andlet. Når eg vaknar, skal eg mettast ved synet av deg.