Read nynorsk 2011 Salmane 19 Bible Online

Salmane 19 - nynorsk 2011 bible

Salmane 19

¹Til korleiaren. Ein salme av David.

² Himmelen kunngjer Guds ære, kvelven fortel om det hans hender har gjort.

³Dagen lèt sin tale strøyma til neste dag, natt gjev sin kunnskap til natt.

⁴Det er ikkje tale og ikkje ord. Stemmene kan ikkje høyrast.

⁵ Men dei når ut over heile jorda, orda når dit verda endar. I himmelen har han reist eit telt for sola,

⁶ lik ein brudgom går ho ut av sitt kammer. Ho gler seg som ein helt til å springa i sin bane.

⁷Ho gjer sin rundgang frå himmelrand til himmelrand, ingen ting er løynd for hennar glød.

⁸ HERRENS lov er fullkomen, ho gjer livet nytt. HERRENS vitnemål står fast, det gjer den uvitande vis.

⁹ HERRENS påbod er rette, dei gjer hjartet glad. HERRENS bod er klårt, det gjev auga lys.

¹⁰Frykta for HERREN er rein, ho varer til evig tid. HERRENS dommar er sanne, rettferdige er dei alle.

¹¹ Dei er meir verde enn gull, skinande gull i mengd, dei er søtare enn honning, ny og rennande honning.

¹² Gjennom dei får din tenar åtvaring. Det gjev stor løn å halda dei.

¹³Kven kjenner sine eigne feilsteg? Frikjenn meg for dei eg ikkje veit om.

¹⁴ Spar din tenar for hovmod, lat det ikkje få meg i si makt! Då er eg heil og fri for store synder.

¹⁵ Måtte orda frå min munn og tankane i mitt hjarte vera til glede for deg, HERRE, min utløysar og mitt berg!