Read nynorsk 2011 Salmane 30 Bible Online

Salmane 30 - nynorsk 2011 bible

Salmane 30

¹Ein salme. Ein song til tempelvigsla. Av David.

² Eg opphøgjer deg, HERRE, for du drog meg opp, du lét ikkje fienden fryda seg over meg.

³ HERRE, min Gud, eg ropa til deg, og du lækte meg.

⁴ HERRE, du førte mi sjel opp frå dødsriket, du gav meg liv på nytt då eg var i grava.

⁵ Spel for HERREN, de hans trugne, pris hans heilage namn!

⁶ Ein augneblink varer hans vreide, heile livet varer hans nåde. Om kvelden kjem gråt som gjest, om morgonen blir det gledesong.

⁷Eg kjende meg trygg og sa: «Aldri skal eg vakla!»

⁸ HERRE, i din velvilje sette du meg på fast fjell; men så løynde du ditt andlet, eg vart gripen av redsle.

⁹Til deg, HERRE, ropa eg, eg bad til Herren om nåde:

¹⁰ «Kva tener det til at blodet renn, at eg går i grav? Kan vel støvet prisa deg? Kan det forkynna din truskap?

¹¹Høyr meg, HERRE, ver meg nådig! HERRE, ver mi hjelp!»

¹² [46] Du vende mi dødsklage til dans, du tok sekkestrien av meg og kledde meg i glede.

¹³Difor syng eg din pris og er ikkje stille. HERRE, min Gud, eg vil alltid prisa deg.