Read nynorsk 2011 Salmane 31 Bible Online

Salmane 31 - nynorsk 2011 bible

Salmane 31

¹[47] Til korleiaren. Ein salme av David.

² HERRE, eg søkjer tilflukt hos deg, lat meg aldri bli til skamme! Fri meg ut i di rettferd!

³ Vend øyret til meg, skund deg og redd meg! Ver meg eit vern og eit berg, ei borg til frelse!

⁴ Du er mitt fjell og mi borg; for ditt namn skuld fører og leier du meg.

⁵ Løys meg or garnet dei har spent ut for meg! For du er mi tilflukt.

⁶ I dine hender gjev eg mi ånd, du løyser meg ut, HERRE, du trufaste Gud.

⁷ Eg hatar dei som held seg til vind og fåfengd. Sjølv set eg mi lit til HERREN.

⁸Eg vil jubla av glede over di miskunn fordi du har sett mi naud, du kjenner mi trengsle.

⁹ Du gav meg ikkje over i handa til fienden, men førte meg ut i ope land.

¹⁰ Ver meg nådig, HERRE, for eg er i naud. Auget sløvest av bitter sorg, pust og kropp svinn bort.

¹¹Livet mitt endar i sorg, åra mine i klage. Min styrke sviktar på grunn av mi skuld, beina i kroppen svinn.

¹² Eg blir til spott for fienden, til hån for grannane, ei redsle for dei som kjenner meg, dei som ser meg på gata, vik unna.

¹³Som ein død er eg gløymd av menneske, lik eit kar som er kasta bort.

¹⁴ For eg høyrer mange som kviskrar — å, redsle på alle kantar! — når dei samlar seg mot meg og legg planar om å ta mitt liv.

¹⁵ Men eg set mi lit til deg, HERRE, eg seier: «Du er min Gud.»

¹⁶ Mine tider er i di hand, fri meg frå fiendar som jagar meg!

¹⁷ [48] Lat ditt andlet lysa over din tenar, frels meg i di miskunn!

¹⁸ HERRE, lat meg ikkje bli til skamme, for eg ropar til deg. Lat dei urettferdige stå med skam og gå stille til dødsriket!

¹⁹Lat lygande lepper tagna, dei som talar frekt mot den rettferdige med hovmod og forakt.

²⁰ Kor stor di miskunn er, som du har spart til dei som fryktar deg! Rett framfor menneske har du vist di miskunn mot dei som søkjer tilflukt hos deg.

²¹ Hos deg finn dei vern mot overgrep frå menneske. Du gøymer dei i di hytte for tunger som kjem med klagemål.

²²Velsigna er HERREN som gjer under! Han viste meg miskunn i ein kringsett by.

²³ Eg sa i min angst: «Eg er støytt bort frå dine auge.» Men du høyrde mi bøn då eg ropa til deg.

²⁴ Elsk HERREN, alle hans trugne! HERREN vernar dei trufaste, men den hovmodige gjev han att i fullt mål.

²⁵ Ver modige og sterke, alle de som ventar på HERREN!