Read nynorsk 2011 Salmane 32 Bible Online

Salmane 32 - nynorsk 2011 bible

Salmane 32

¹Av David. Ein læresalme. Sæl er den som får sine brot tilgjevne og sine synder tildekte!

²Sælt er det mennesket som HERREN ikkje tilreknar skuld, som i si ånd er utan svik.

³Så lenge eg tagde, tærtest beina i kroppen bort medan eg stønna heile dagen.

⁴For dag og natt låg di hand tungt på meg. Mi livssaft svann som i heten om sommaren. Sela

⁵ Då sanna eg mi synd for deg, og mi skuld dekte eg ikkje over. Eg sa: «Eg vil sanna mine brot for HERREN.» Og du tok bort mi syndeskuld. Sela

⁶Difor skal alle trugne be til deg i tider med trengsle. Om det kjem ein veldig flaum, skal vatnet ikkje nå dei.

⁷Du skjermar meg, du vernar meg mot naud, med frelsejubel omgjev du meg. Sela

⁸ Eg vil gjera deg vis og læra deg den vegen du skal gå, eg vil la mitt auge kvila på deg og gje deg råd.

⁹ Ver ikkje lik hest og muldyr, utan vit! Deira prydnad er taum og beksel til å tvinga dei med, elles kjem dei ikkje til deg.

¹⁰ Den urettferdige har mange plager, men den som set si lit til HERREN, kransar han med miskunn.

¹¹ Gled dykk i HERREN og jubla, de rettferdige! Bryt ut i fagnadrop, alle de ærlege av hjartet!