Read nynorsk 2011 Salmane 33 Bible Online

Salmane 33 - nynorsk 2011 bible

Salmane 33

¹ Rop av fryd for HERREN, de rettferdige! Det er rett at dei rettskafne syng lovsong.

² [49] Pris HERREN til lyre, spel for han på tistrengja harpe!

³ Syng ein ny song for han, spel vakkert og rop med jubel!

⁴ For HERRENS ord er sant, alt han gjer, kan ein lita på.

⁵Han elskar rettferd og rett, jorda er full av HERRENS miskunn.

⁶ [50] Ved HERRENS ord vart himmelen skapt, heile himmelhæren ved pusten frå hans munn.

⁷ Han samla havvatnet som i eit kar, la havsens djup i forråd.

⁸Heile verda må frykta HERREN, alle som bur på jorda, må skjelva for han.

⁹ Han tala, og det skjedde, han baud, og det stod der.

¹⁰ HERREN skiplar rådet folka legg, bryt planane folkeslag tenkjer ut.

¹¹ HERRENS råd står fast for alltid, hans hjartans planar frå slekt til slekt.

¹² Sælt er det folk som har HERREN til Gud, det folk han har valt til sin eigedom!

¹³ HERREN skodar ned frå himmelen, han ser alle menneske.

¹⁴Frå sin bustad ser han ned på alle som bur på jorda.

¹⁵ Han har forma deira hjarte, alle deira gjerningar kjenner han.

¹⁶ Kongen blir ikkje redda av stor styrke, stridsmannen blir ikkje berga av stor kraft.

¹⁷ Hesten gjev falske voner om hjelp, med sin store styrke bergar han ingen.

¹⁸ Men HERRENS auge kviler på dei som fryktar han og ventar på hans miskunn,

¹⁹ så han kan fria dei frå døden og halda dei i live gjennom hungersnaud.

²⁰ Vår sjel ventar på HERREN; han er vår hjelp og vårt skjold.

²¹Vårt hjarte gleder seg i han, vi set vår lit til hans heilage namn.

²²Lat di miskunn vera over oss, HERRE! Det er deg vi ventar på.