Read nynorsk 2011 Salmane 35 Bible Online

Salmane 35 - nynorsk 2011 bible

Salmane 35

¹Av David. HERRE, strid mot dei som strider mot meg. Kjemp mot dei som kjempar mot meg!

²Grip rundskjold og langskjold, reis deg og hjelp meg!

³Ta spyd og stridsøks fram mot dei som jagar meg. Sei til meg: «Eg er di frelse!»

⁴ Lat dei som står meg etter livet, bli til spott og skam. Lat dei som tenkjer ut vondt imot meg, dra seg attende med skam!

⁵ Gjev dei må bli som agner for vinden når HERRENS engel støyter dei bort.

⁶ Gjev deira veg blir mørk og glatt når HERRENS engel jagar dei.

⁷For utan grunn har dei spent ut sitt garn, utan grunn har dei grave ei fallgrav for meg.

⁸ Måtte ulukka koma uventa over han. Måtte garnet han spente ut, fanga han sjølv. Måtte han falla i ulukke!

⁹ Men eg skal jubla i HERREN og gleda meg over hans frelse.

¹⁰Kvart bein i kroppen skal seia: «HERRE, kven er som du, du bergar den hjelpelause frå den som er sterkare enn han, ein fattig stakkar frå den som ranar han.»

¹¹ Falske vitne reiser seg, dei spør meg om slikt eg ikkje veit.

¹² Dei løner godt med vondt, eg sit att åleine.

¹³ [53] Men eg kledde meg i sekkestrie då dei var sjuke. Eg plaga meg med faste og bad med hovudet bøygd

¹⁴som for ein ven eller bror. Lik ein som sørgjer over mor si, gjekk eg nedbøygd i svarte klede.

¹⁵Men når eg snåvar, blir dei glade og samlar seg. Dei samlar seg mot meg for å slå utan at eg veit om det, dei riv og slit utan stans.

¹⁶ Ugudelege som dei er, spottar og håner dei, dei skjer tenner mot meg.

¹⁷ Herre, kor lenge vil du sjå på? Berg mitt liv frå herjingane deira, det einaste eg har, frå løvene!

¹⁸ Eg vil prisa deg i den store forsamlinga, i folkemengda vil eg lova deg.

¹⁹ Lat ikkje mine svikefulle fiendar gleda seg over meg! Dei som hatar meg utan grunn, skal ikkje få senda meg hånlege blikk.

²⁰For dei talar ikkje venleg, men tenkjer ut svikefulle planar mot dei stille i landet.

²¹Dei sperrar opp munnen imot meg og ler hånleg: «Vi har sett det med eigne auge!»

²² Du ser det, HERRE. Tei ikkje! Herre, ver ikkje langt borte frå meg!

²³ Vakna og hjelp meg til min rett, min Gud og Herre, før mi sak!

²⁴Døm meg etter di rettferd, HERRE, min Gud. Lat dei ikkje gleda seg over meg!

²⁵Dei skal ikkje le og tenkja: «Som vi ønskte!» Dei skal ikkje seia: «Vi har slukt han.»

²⁶ Alle som gler seg over mi ulukke, skal bli til spott og skam. Dei som ser ned på meg, skal kle seg i skam og vanære.

²⁷ Dei som bryr seg om min rett, skal jubla og gleda seg. Alltid skal dei seia: «Stor er HERREN, som ønskjer fred for sin tenar.»

²⁸Mi tunge skal forkynna di rettferd og lovprisa deg heile dagen.