Read nynorsk 2011 Salmane 36 Bible Online

Salmane 36 - nynorsk 2011 bible

Salmane 36

¹Til korleiaren. Av HERRENS tenar. Av David.

² Synda talar til den lovlause djupt i hans hjarte. Redsle for Gud har han ikkje for auge.

³Han ser det som smiger at ein oppdagar hans skuld og legg han for hat.

⁴Kvart ord frå hans munn er urett og svik. Han er ikkje forstandig meir og gjer ikkje det gode.

⁵ Han legg vonde planar på leiet. Han vel ein veg som ikkje er god. Han viser ikkje frå seg det vonde.

⁶ HERRE, til himmelen når di miskunn, til skyene rekk din truskap.

⁷Di rettferd er som mektige fjell, som det store havdjup er dine dommar. HERRE, du bergar både menneske og dyr.

⁸ Kor verdfull din kjærleik er, Gud! I skuggen av dine venger søkjer menneskeborna ly.

⁹ Dei får nyta overfloda i ditt hus, du lèt dei drikka av gledebekken din.

¹⁰ For hos deg er livsens kjelde, i ditt lys ser vi lys.

¹¹Lat di miskunn vara for dei som kjenner deg, di rettferd for dei ærlege av hjartet.

¹²Lat ikkje foten til den stolte trø meg ned! Handa til den lovlause skal ikkje jaga meg bort.

¹³Der ligg dei, dei som gjer urett. Dei er støytte ned og kan ikkje reisa seg.