Read nynorsk 2011 Salmane 38 Bible Online

Salmane 38 - nynorsk 2011 bible

Salmane 38

¹Ein salme av David. Til påminning.

² HERRE, refs meg ikkje i din vreide, straff meg ikkje i din harme!

³ For dine piler har råka meg, di hand kviler tungt på meg.

⁴I kroppen er ingenting uskadd, for du er harm, ikkje eit bein er heilt, for eg har synda.

⁵ Skulda veks meg over hovudet lik ei bør som er altfor tung.

⁶Eg har sår som luktar og renn av verk på grunn av min dårskap.

⁷ Eg er kroket og nedbøygd, eg går og sørgjer dagen lang.

⁸Hoftene brenn av smerte, ingenting er friskt i mitt kjøt.

⁹Eg er kraftlaus og knust; eg skrik ut mitt hjartes klage.

¹⁰ Herre, du kjenner min lengsel, mitt sukk er ikkje løynt for deg.

¹¹Hjartet hamrar, krafta sviktar, sjølv lyset i auga har forlate meg.

¹² Vener og dei som står meg nær, held seg borte frå mi plage, mine næraste held seg langt unna.

¹³Dei som står meg etter livet, set snarer for meg. Dei som vil meg vondt, talar om å skada meg, dei grundar dagen lang på svik.

¹⁴ Men eg er lik ein døv, eg høyrer ikkje, eg er lik ein mållaus som ikkje opnar munnen.

¹⁵Eg er lik ein mann som ikkje høyrer og ikkje har svar i sin munn.

¹⁶ Men det er deg, HERRE, eg ventar på. Du vil svara meg, Herre, min Gud.

¹⁷Eg sa: Lat dei ikkje gleda seg over meg og ikkje briska seg når foten min er ustø.

¹⁸For eg held på å falla, mi smerte står alltid for meg.

¹⁹ Ja, eg vedkjenner mi skuld og sørgjer over mi synd.

²⁰Men fiendane lever og er sterke, dei som hatar meg utan grunn, er mange.

²¹ Dei som løner godt med vondt, står meg imot fordi eg jagar etter det gode.

²² HERRE, forlat meg ikkje! Min Gud, ver ikkje langt borte frå meg!

²³Skund deg og hjelp meg, HERRE, mi frelse!