Read nynorsk 2011 Salmane 40 Bible Online

Salmane 40 - nynorsk 2011 bible

Salmane 40

¹Til korleiaren. Ein salme av David.

²Eg venta og vona på HERREN. Han bøygde seg til meg og høyrde mitt rop.

³ Han drog meg opp or den tynande grav, opp av den djupe gjørma. Han sette mine føter på fjell og gjorde mine steg faste.

⁴ Han la ein ny song i min munn, ein lovsong til vår Gud. Mange skal sjå det og ottast og setja si lit til HERREN.

⁵ Sæl er den som set si lit til HERREN, som ikkje vender seg til dei stolte, til dei som fell frå i løgn.

⁶ Store ting har du gjort for oss, HERRE, min Gud, underfulle verk og planar, ingen er din like. Vil eg fortelja og tala om dei, er dei for mange til å reknast.

⁷ Du har ikkje glede i offer og gåver — du har opna mine øyre — brennoffer og syndoffer krev du ikkje.

⁸ Då sa eg: «Sjå, her kjem eg. I bokrullen er det skrive om meg.

⁹Min Gud, å gjera din vilje gjev meg glede, di lov er djupt i mitt indre.»

¹⁰ Eg forkynte rettferd i den store forsamlinga. Eg heldt ikkje att mi tunge, HERRE, du veit det.

¹¹Di rettferd heldt eg ikkje skjult i hjartet, eg tala om din truskap og di frelse. Eg løynde ikkje di miskunn og di sanning i den store forsamlinga.

¹² HERRE, du vil ikkje halda di miskunn tilbake. Din truskap og di sanning skal alltid verna meg.

¹³ For tallause ulukker omgjev meg, mine synder har nådd meg att, eg kan ikkje sjå. Dei er fleire enn håra på hovudet, motet har svikta meg.

¹⁴ Vis godvilje, HERRE, og fri meg ut! HERRE, skund deg og hjelp meg!

¹⁵ Lat alle som står meg etter livet, bli til skamme og til spott! Lat dei som vil meg vondt, dra seg tilbake utan ære!

¹⁶ Dei som ler og håner meg, skal bli slegne av skam.

¹⁷ Lat alle som søkjer deg, fryda og gleda seg i deg! Lat dei som elskar di frelse, alltid seia: «Stor er HERREN!»

¹⁸ Men eg er hjelpelaus og fattig. HERREN skal tenkja på meg. Du er mi hjelp, du bergar meg. Dryg ikkje lenger, min Gud!