Read nynorsk 2011 Salmane 41 Bible Online

Salmane 41 - nynorsk 2011 bible

Salmane 41

¹Til korleiaren. Ein salme av David.

² Sæl er den som har omsorg for dei veike. På ulukkedagen friar HERREN han ut.

³ HERREN vernar han og held han i live. lukkeleg er han i landet. Du overgjev han ikkje til grådige fiendar!

⁴ HERREN styrkjer han i sjukdomen; du forvandlar leiet hans når han er sjuk.

⁵ Men eg seier: «HERRE, ver meg nådig; læk meg, for eg har synda mot deg!»

⁶Fienden talar vondt om meg: «Når skal han døy og namnet hans gå til grunne?»

⁷Kjem det ein og ser til meg, talar han tomme ord. Hjartet hans samlar på det vonde, så går han ut og talar om det.

⁸Alle som hatar meg, kviskrar saman, dei legg vonde planar mot meg:

⁹«Noko vondt har råka han, no ligg han der og står aldri meir opp.»

¹⁰ Jamvel venen min som eg leit på, han som åt ved mitt bord, lyfter hælen mot meg.

¹¹Men du, HERRE, ver meg nådig og reis meg opp, så eg kan gje dei att.

¹²Når fienden ikkje får triumfera over meg, veit eg at du har di glede i meg.

¹³ Fordi eg er heil, held du meg fast, du lèt meg alltid stå for ditt andlet.

¹⁴Velsigna er HERREN, Israels Gud, frå æve til æve! Amen! Ja, amen!