Read nynorsk 2011 Salmane 42 Bible Online

Salmane 42 - nynorsk 2011 bible

Salmane 42

¹[57] Til korleiaren. Ein læresalme. Av Korah-songarane.

²Som hjorten lengtar etter bekker med vatn, lengtar mi sjel etter deg, min Gud.

³ Mi sjel tørstar etter Gud, etter den levande Gud. Når skal eg få koma fram for Guds andlet?

⁴ Tårer er mitt brød dag og natt. Dagen lang spør dei meg: «Kvar er din Gud?»

⁵ [58] Dette minnest eg, min lengsel vell fram: Til Guds hus vandra eg i festskaren med jubelrop og lovsong — ein pilegrimsskare i fest.

⁶ Kvifor er du sorgtyngd, mi sjel, kvifor er du uroleg? Eg vil venta på Gud! Endå ein gong skal eg prisa han, min frelsar og min Gud.

⁷ [59] Eg er sorgtyngd, difor går min tanke til deg frå Jordan- og Hermonlandet, frå berget Misár.

⁸ Djup ropar til djup når dine fossar durar. Alle dine bølgjer og brot slår over meg.

⁹ HERREN sender si miskunn om dagen, songen hans er hos meg om natta, ei bøn til mitt livs Gud.

¹⁰ Eg seier til Gud, mitt berg: «Kvifor har du gløymt meg, kvifor må eg gå og sørgja medan fienden plagar meg?»

¹¹Mine fiendars hån går gjennom merg og bein. Dagen lang spør dei meg: «Kvar er din Gud?»

¹²Kvifor er du sorgtyngd, mi sjel, kvifor er du uroleg? Eg vil venta på Gud! Endå ein gong skal eg prisa han, min frelsar og min Gud.