Read nynorsk 2011 Salmane 44 Bible Online

Salmane 44 - nynorsk 2011 bible

Salmane 44

¹Til korleiaren. Av Korah-songarane. Ein læresalme.

² Gud, vi har høyrt det med eigne øyre, våre fedrar har fortalt oss om gjerninga du gjorde i deira tid, i gamle dagar.

³ Med di hand dreiv du folkeslag ut, men du planta våre fedrar; du fór ille med folka, men lét våre fedrar fara fritt.

⁴ [61] Dei tok ikkje landet ved sverd. Deira eigen arm gav ingen siger, det var di høgre hand og din arm og lyset frå ditt andlet, for du hadde dei kjær.

⁵Berre du er min konge og Gud, som byd at Jakob skal bergast.

⁶ Ved deg støyter vi fienden ned, ved ditt namn trakkar vi på dei som står oss imot.

⁷ For eg set ikkje mi lit til bogen, det er ikkje sverdet som bergar meg.

⁸Nei, du har frelst oss frå fienden, dei som hatar oss, gjorde du til skamme.

⁹Vi frydar oss alltid i Gud, vi prisar ditt namn til evig tid. Sela

¹⁰ Likevel har du støytt oss bort og ført skam over oss, du drog ikkje ut med våre hærar.

¹¹Du lét oss vika tilbake for fienden, dei som hata oss, rana til seg hærfang.

¹²Du har gjort oss til slaktefe og spreidd oss mellom folka.

¹³ Du har selt ditt folk til spottpris, du tok ikkje stor betaling.

¹⁴ Du har gjort oss til spott for våre grannar, til hån for dei som bur ikring oss.

¹⁵ Du har gjort oss til eit ordtak mellom folka, du lèt folkeslag rista på hovudet av oss.

¹⁶Dagen lang er mi vanære framfor meg, andletet er dekt av skam

¹⁷under ropa frå dei som håner og spottar, ved synet av fienden og hemnaren.

¹⁸ Alt dette har kome over oss endå vi ikkje har gløymt deg og ikkje svike di pakt.

¹⁹Vårt hjarte har ikkje vendt seg bort, våre steg har ikkje bøygd av frå din veg.

²⁰ [62] Likevel har du knust oss der sjakalar bur, og lagt dødsskuggen over oss.

²¹Om vi gløymde vår Guds namn og lyfte våre hender til ein framand gud,

²² så ville vel Gud ha funne det ut, han som kjenner dei løynde tankane i hjartet?

²³ Men for di skuld blir vi drepne dagen lang, vi blir rekna som slaktesauer.

²⁴ Reis deg! Kvifor søv du, Herre? Vakna, støyt oss ikkje bort for alltid!

²⁵ Kvifor løyner du ditt andlet, kvifor gløymer du vår naud og trengsle?

²⁶Vi søkk ned i støvet, vi ligg pressa mot jorda.

²⁷ Reis deg og hjelp oss, fri oss ut i di miskunn!