Read nynorsk 2011 Salmane 45 Bible Online

Salmane 45 - nynorsk 2011 bible

Salmane 45

¹[63] Til korleiaren. Etter «Liljene». Av Korah-songarane. Ein læresalme. Ein song om kjærleik.

²Mitt hjarte strøymer over av gode ord, eg diktar mine songar for kongen. Tunga er lik pennen til ein dyktig skrivar.

³ Du er den fagraste av menneske, vakker tale er lagd på dine lepper. Difor har Gud velsigna deg for alltid.

⁴Spenn sverdet fast ved hofta, du krigar, i di høgd og din herlegdom!

⁵Vinn siger i din herlegdom! Ri ut til strid for sanning, mildskap og rett! Di høgre hand lèt deg sjå skremmande gjerningar.

⁶Pilene dine er kvasse, folkeslag stuper for deg. Kongens fiendar er råka i hjartet.

⁷ [64] Din kongsstol, Gud, står til evig tid, din kongsstav er rettferds stav.

⁸ Du har elska rettferd og hata urett. Difor har Gud, din Gud, salva deg med gledes olje framfor dine vener.

⁹ [65] Du er sveipt i angen frå myrra, aloe og kassia. Strengespel frå elfenbeinshallar gjev deg glede.

¹⁰ Kongsdøtrer er mellom dine utvalde, ved di høgre side står dronninga i Ofir-gull.

¹¹Høyr, dotter, sjå hit og vend øyret til! Gløym ditt folk og di slekt,

¹²for kongen attrår din venleik. Han er din herre, bøy deg ned for han!

¹³ Tyros' dotter og dei rike i folket skal søkja din gunst med gåver.

¹⁴Fullkomen, herleg trer kongsdottera inn, kjolen hennar er gjennomvoven med gull.

¹⁵I fargerik bunad blir ho leidd til kongen. Unge jenter er bak henne, veninnene hennar blir førte fram for deg.

¹⁶Dei blir leidde inn med fryd og glede, dei går inn i kongens slott.

¹⁷Sønene dine skal koma i staden for fedrane, set dei til hovdingar kringom i landet!

¹⁸ Frå slekt til slekt vil eg minnast ditt namn, difor skal folka lova deg til evig tid.