Read nynorsk 2011 Salmane 46 Bible Online

Salmane 46 - nynorsk 2011 bible

Salmane 46

¹[66] Til korleiaren. Av Korah-songarane. Etter «Alamot». Ein song.

² Gud er vår tilflukt og styrke, ei hjelp i naud og alltid nær.

³ Difor reddast vi ikkje når jorda skakar, når fjella vaklar i havsens djup.

⁴Vatnet buldrar og brusar, fjella skjelv når havet reiser seg. Sela

⁵ [67] Det finst ei elv med bekker som gleder Guds by, den mest heilage bustaden til Den høgste.

⁶ Gud er midt i han, byen kan ikkje vakla. Gud hjelper han når morgonen gryr.

⁷ Folkeslag buldra, rike vakla, han lét røysta ljoma, jorda skalv.

⁸ HERREN Sebaot er med oss, Jakobs Gud er vår faste borg. Sela

⁹ Kom og sjå alt HERREN har gjort, han som gjer skremmande ting på jorda!

¹⁰ Han gjer slutt på krig over heile jorda, han bryt bogar sund, høgg spyda av, han set eld på vogner.

¹¹Hald opp! Kjenn at eg er Gud. Eg er opphøgd over folkeslag, opphøgd på jorda.

¹² HERREN Sebaot er med oss, Jakobs Gud er vår faste borg. Sela