Read nynorsk 2011 Salmane 49 Bible Online

Salmane 49 - nynorsk 2011 bible

Salmane 49

¹Til korleiaren. Av Korah-songarane. Ein salme.

²Høyr dette, alle folk, lyd etter, alle som bur i verda,

³høg og låg, rik og fattig!

⁴ Min munn talar visdom, det hjartet tenkjer, er forstand.

⁵Eg vil venda mitt øyre til visdomsord, tyda mi gåte til klangen frå lyra.

⁶Kvifor frykta i vonde dagar, når eg blir kringsett av svikarars vondskap?

⁷ Dei set si lit til sitt gods og skryter av sin store rikdom.

⁸Ingen kan kjøpa fri ein bror, ingen kan gje Gud løysepengar for han.

⁹Det er kostbart å kjøpa livet hans fri, det må ein gje opp for alltid.

¹⁰Kunne han vel leva evig og aldri sjå grava?

¹¹ Sjølv vismenn døyr, det kan alle sjå, med dårar og uforstandige går dei til grunne. Dei etterlèt sitt gods til andre.

¹² [71] Grava blir deira heim for evig, ein bustad frå slekt til slekt, dei som samla seg jord i sitt eige namn.

¹³ Med all si prakt kan mennesket ikkje vara. Det liknar dyra som må døy.

¹⁴Slik går det med dei som lit på seg sjølve, og med dei som følgjer etter og gleder seg over deira ord. Sela

¹⁵Som sauer fer dei til dødsriket, døden er deira gjetar. Dei rettskafne skal herska over dei når morgonen renn. Deira skapnad tærest bort, i dødsriket skal dei ha sin bustad.

¹⁶ Men Gud vil kjøpa meg fri frå dødsrikets grep, for han vil ta meg til seg. Sela

¹⁷Ver ikkje redd når nokon blir rik, når velstanden aukar i hans hus.

¹⁸ For når han døyr, får han ingenting med, velstanden følgjer han ikkje i grava.

¹⁹ Han prisar seg lukkeleg her i livet: «Folk rosar deg, for du gjer det godt.»

²⁰Likevel går han til sine fedrar, til dei som aldri meir får sjå lys.

²¹Med all si prakt kan mennesket ikkje forstå, det er likt dyra som må døy.