Read nynorsk 2011 Salmane 5 Bible Online

Salmane 5 - nynorsk 2011 bible

Salmane 5

¹Til korleiaren. Med fløytespel. Ein salme av David.

² HERRE, høyr mine ord! Lytt til mi klage!

³Høyr mitt rop om hjelp, min konge og min Gud, for eg bed til deg.

⁴ HERRE, om morgonen høyrer du mi røyst, tidleg ber eg fram mitt offer og ventar.

⁵ Du er ein Gud som ikkje toler urett. Ingen vonde får bu hos deg.

⁶Dei hovmodige får ikkje stiga fram for dine auge. Du hatar alle som gjer vondt,

⁷ du gjer ende på dei som talar løgn. HERREN avskyr drapsmenn og svikarar.

⁸Men ved di store miskunn kan eg gå inn i ditt hus. Eg kastar meg ned i ærefrykt for deg, vend mot ditt heilage tempel.

⁹ HERRE, lei meg i di rettferd så fienden ikkje når meg. Gjer vegen din jamn for meg!

¹⁰ For det finst ikkje sanning i deira munn, forderva er deira indre. Strupen er ei open grav, og tunga er glatt.

¹¹Gud, lat dei bøta for si skuld, lat dei falla for sine eigne planar! Driv dei bort og sprei dei, syndene deira er mange. For dei har trassa deg.

¹² Men alle som søkjer tilflukt hos deg, skal gleda seg, alltid skal dei jubla. Du vernar dei. Dei frydar seg i deg, dei som elskar ditt namn.

¹³ For du, HERRE, velsignar den rettferdige, du dekkjer han med nåde som skjold.