Read nynorsk 2011 Salmane 50 Bible Online

Salmane 50 - nynorsk 2011 bible

Salmane 50

¹[72] Ein salme av Asaf. Gud over gudar talar, HERREN ropar til jorda der sol går opp og der sol går ned.

² Frå Sion, det fullkome vakre, strålar Gud fram.

³ Vår Gud kjem, han teier ikkje. Framfor han går ein øydande eld, kring han stormar det sterkt.

⁴Han kallar på himmelen der oppe og på jorda, for han vil dømma sitt folk.

⁵ Samla mine trugne hos meg, dei som med offer har gjort pakt med meg.

⁶ Himmelen forkynner hans rettferd, Han er ein Gud som dømmer. Sela

⁷ Høyr, mitt folk, eg vil tala, Israel, eg vil vitna mot deg. Eg er Gud, din Gud.

⁸ Det er ikkje for dine slaktoffer eg viser deg til rette, dine brennoffer er alltid framfor meg.

⁹Men eg tek ikkje oksar frå ditt hus eller bukkar frå dine kveer.

¹⁰For alt viltet i skogen er mitt, dyra på dei tusen fjell.

¹¹Eg kjenner alle fuglar i fjellet, krypet på marka høyrer meg til.

¹² Var eg svolten, sa eg det ikkje til deg, for jorda og det som fyller henne, høyrer meg til.

¹³ Skulle eg eta kjøt av oksar eller drikka blod av bukkar?

¹⁴ Du skal ofra lovsong til Gud, oppfylla dine lovnader til Den høgste!

¹⁵ Kall på meg den dagen du er i naud, så vil eg fria deg ut, og du skal gje meg ære.

¹⁶Men til den lovlause seier Gud: Kvifor står du og ramsar opp mine bod og tek mi pakt i din munn?

¹⁷ Du har jo hata formaning og kasta mine ord bak deg.

¹⁸Ser du ein tjuv, slår du følgje med han, med ekteskapsbrytarar held du lag.

¹⁹Du slepper munnen laus i vondskap, med tunga spinn du svik.

²⁰Du sit og talar mot bror din, son til mor di skitnar du til.

²¹Dette gjorde du, og eg tagde. Du tenkte eg var nett som du. Men eg skal visa deg til rette, stilla saka fram for deg.

²²Forstå dette, de som gløymer Gud! Elles riv eg dykk sund, og ingen kan berga dykk.

²³ Den som ofrar lovsong, gjev meg ære, den som gjer sin veg fast, lèt eg sjå Guds frelse.