Read nynorsk 2011 Salmane 51 Bible Online

Salmane 51 - nynorsk 2011 bible

Salmane 51

¹Til korleiaren. Ein salme av David,

²då profeten Natan kom til han etter at han hadde vore hos Batseba.

³ Ver meg nådig, Gud, i din kjærleik, stryk ut mitt brot i di store miskunn!

⁴Vask meg rein for skuld og reins meg for mi synd!

⁵For mine brot kjenner eg, mi synd står alltid for meg.

⁶ Mot deg åleine har eg synda, det som er vondt i dine auge, har eg gjort. Difor har du rett når du talar, du er rein når du feller dom.

⁷ Ja, med skuld vart eg fødd, med synd vart eg til i mors liv.

⁸Sjå, du gler deg over sanning i mitt indre, du lærer meg visdom i det løynde.

⁹ [73] Ta bort mi synd med isop, så eg blir rein, vask meg, så eg blir kvitare enn snø.

¹⁰Lat meg få oppleva fryd og glede, lat beina du knuste, få jubla.

¹¹Løyn ditt andlet for mine synder, stryk ut all mi skuld!

¹² Gud, skap i meg eit reint hjarte, gjev meg ei ny og stødig ånd!

¹³ Driv meg ikkje bort frå ditt andlet, ta ikkje frå meg din heilage Ande!

¹⁴Gjev meg atter gleda over di frelse, hald meg oppe med ei villig ånd!

¹⁵ Eg vil læra brotsmenn dine vegar, syndarar skal venda om til deg.

¹⁶ [74] Fri meg, Gud, frå blodskuld, du Gud som er mi frelse! Så skal tunga mi jubla over di rettferd.

¹⁷Herre, lat opp mine lepper så min munn kan lovprisa deg.

¹⁸ For du har ikkje glede i slaktoffer; mitt brennoffer bryr du deg ikkje om.

¹⁹ Offer for Gud er ei sundbroten ånd. Gud, du foraktar ikkje eit sundbrote og knust hjarte.

²⁰ Gjer vel mot Sion i din nåde, bygg Jerusalems murar!

²¹ Då skal du ha glede i rette offer, brennoffer og heiloffer. Då skal dei ofra oksar på ditt altar.