Read nynorsk 2011 Salmane 55 Bible Online

Salmane 55 - nynorsk 2011 bible

Salmane 55

¹Til korleiaren. Med strengespel. Ein læresalme. Av David.

² Vend øyret til mi bøn, Gud, løyn deg ikkje når eg bed.

³Lytt til meg og gjev meg svar! Eg er kvilelaus i mi sut. Eg er ute av meg,

⁴for fienden ropar, dei lovlause trykkjer meg ned. Dei velter urett over meg, rasande går dei mot meg.

⁵ Hjartet vrid seg i meg, eg er gripen av dødsangst.

⁶Eg skjelv av frykt, eg er overvelda av redsle.

⁷ Eg sa: Hadde eg berre venger som dua! Då flaug eg bort og fann meg ein bustad.

⁸Langt av garde ville eg rømma, i ørkenen ville eg slå meg ned. Sela

⁹Eg ville skunda meg i ly for rasande vind og storm.

¹⁰ HERRE, forvirr dei og kløyv deira tungemål! For eg ser vald og strid i byen.

¹¹Dag og natt går dei ikring på bymuren. Innanfor er ugjerning og urett.

¹²Øydelegging rår der inne, svik og vald vik ikkje frå torget.

¹³Var det ein fiende som spotta meg, kunne eg bera det. Var det ein uven som såg ned på meg, ville eg gøyma meg for han.

¹⁴ Men det er du, min like, min gode ven og kjenning,

¹⁵vi som tala fortruleg saman og gjekk i festtog i Guds hus.

¹⁶ Lat døden koma over dei, lat dei fara til dødsriket midt i livet! For dei har vondskap i heim og hug.

¹⁷Men eg vil ropa til Gud, og HERREN skal frelsa meg.

¹⁸ Kveld og morgon og midt på dagen klagar og sukkar eg, og han skal høyra ropet mitt.

¹⁹ Han skal fria meg frå strid og gje meg fred, endå mange går mot meg.

²⁰ Gud skal høyra og audmjuka dei, han som tronar frå eldgammal tid. Sela For dei forandrar seg ikkje, dei fryktar ikkje Gud.

²¹Fienden legg hand på sine vener, han bryt si pakt.

²² Hans tale er glattare enn smør, men han har strid i sinne. Hans ord er mjukare enn olje, men dei er dregne sverd.

²³ Kast di bør på HERREN, han vil sørgja for deg! Han lèt aldri den rettferdige vakla.

²⁴ Men du er Gud. Støyt dei ned i den djupe grava! Drapsmenn og svikarar når ikkje halve si levetid. Men eg set mi lit til deg.