Read nynorsk 2011 Salmane 56 Bible Online

Salmane 56 - nynorsk 2011 bible

Salmane 56

¹[78] Til korleiaren. Etter «Dua i terebintene langt borte». Ein miktam. Av David, då filistrane greip han i Gat.

²Ver meg nådig, Gud! Folk jagar meg, stridsmenn trengjer seg på meg heile dagen.

³ Fiendar jagar meg dagen lang, frå si høgd går dei til åtak, dei er mange.

⁴Når eg er redd, stolar eg på deg.

⁵ Eg stolar på Gud, eg prisar hans ord. Eg stolar på Gud, eg er ikkje redd. Kva kan vel menneske gjera meg?

⁶Dei vrir på orda mine dagen lang, dei tenkjer berre på å skada meg.

⁷ Dei slår seg saman og ligg på lur, dei vaktar mine steg, ventar berre på å ta mitt liv.

⁸ Skal dei sleppa unna med sin urett? Støyt folkeslag ned i din vreide, Gud!

⁹ Du har talt mine heimlause steg, mine tårer har du samla i di lêrflaske. Står det ikkje i di bok?

¹⁰Difor må fienden dra seg tilbake den dagen eg ropar. Det veit eg, at Gud er med meg.

¹¹Eg stolar på Gud, eg prisar ordet, eg lit på HERREN, eg prisar ordet.

¹²Eg stolar på Gud, eg er ikkje redd. Kva kan eit menneske gjera meg?

¹³ Eg vil halda mine lovnader til deg, Gud, difor kjem eg med lovsongsoffer til deg.

¹⁴ For du har berga mitt liv frå døden og foten frå å snubla, så eg kan ferdast for Guds andlet i livsens lys.