Read nynorsk 2011 Salmane 57 Bible Online

Salmane 57 - nynorsk 2011 bible

Salmane 57

¹[79] Til korleiaren. «Øydelegg ikkje!» Ein miktam. Av David, då han rømde for Saul og gøymde seg i hòla.

² Ver meg nådig, Gud, ver meg nådig! For eg søkjer tilflukt hos deg. I skuggen av dine venger søkjer eg ly til faren er over.

³Eg ropar til Gud, Den høgste, til Gud som gjer vel mot meg.

⁴ Han skal senda meg hjelp frå himmelen, håna dei som jagar meg Sela og gje meg si miskunn og sin truskap.

⁵ Sjølv ligg eg midt mellom løver som vil sluka menneske. Tennene deira er spyd og piler, tunga er eit kvast sverd.

⁶Vis deg høg over himmelen, Gud, vis din herlegdom over all jorda!

⁷ Dei la ut eit nett for mine føter, dei pressa meg ned. Dei grov ei fallgrav for meg, men sjølve fall dei ned i grava. Sela

⁸ Mitt hjarte er roleg, Gud, roleg og trygt. Eg vil syngja og spela.

⁹Vakna, mi ære, vakna, harpe og lyre! Eg vil vekkja morgonròden.

¹⁰ Eg vil takka deg mellom folka, Herre, lovsyngja deg mellom folkeslag.

¹¹ For di miskunn når til himmelen, din truskap til skyene.

¹²Vis deg høg over himmelen, Gud, vis din herlegdom over all jorda!