Read nynorsk 2011 Salmane 59 Bible Online

Salmane 59 - nynorsk 2011 bible

Salmane 59

¹Til korleiaren. «Øydelegg ikkje!» Ein miktam. Av David, då Saul sende folk som skulle vakta på huset for å drepa han.

² Gud, fri meg frå fiendar, vern meg mot dei som reiser seg mot meg!

³Fri meg frå dei som gjer urett, frels meg frå drapsmenn!

⁴ No ligg dei og lurer på meg. Dei sterke kastar seg over meg, men brot eller synder har eg ikkje gjort, HERRE.

⁵ Eg er utan skuld, men dei spring fram og stiller opp til strid. Vakna, kom til meg og sjå!

⁶ Gud, HERRE Sebaot, du er Israels Gud. Vakna og hald rekneskap med alle folk, ver ikkje nådig mot dei som fer med urett og svik! Sela

⁷Dei kjem att kvar kveld, dei hyler som hundar og går rundt i byen.

⁸ Høyr, dei lèt munnen renna over, leppene er som sverd. Er det nokon som høyrer?

⁹ Men du, HERRE, ler av dei, du håner alle folkeslag.

¹⁰ Min styrke, eg ser etter deg, for Gud er mitt vern.

¹¹ Min Gud møter meg med miskunn, han lèt meg sjå ned på mine fiendar.

¹² Drep dei ikkje, for då gløymer folket. Styrt dei med makt så dei må flakka omkring, Herre, vårt skjold!

¹³ Orda dei har på leppene, er synd frå deira munn. Lat dei fangast i sitt hovmod! Dei talar forbanning og løgn.

¹⁴ [80] Gjer ende på dei i din harme, gjer ende på dei, så dei ikkje meir er til. Så skal dei skjøna at det er Gud som rår i Jakob, heilt til endane av jorda. Sela

¹⁵Dei kjem att kvar kveld, dei hyler som hundar og går rundt i byen.

¹⁶Dei flakkar om etter mat, dei knurrar om dei ikkje blir mette.

¹⁷ Men eg vil syngja om di makt og jubla kvar morgon over di miskunn. For du har vorte mitt vern, ei tilflukt den dagen eg er i naud.

¹⁸Min styrke, eg vil syngja for deg, for Gud er mitt vern, min Gud som viser miskunn.