Read nynorsk 2011 Salmane 60 Bible Online

Salmane 60 - nynorsk 2011 bible

Salmane 60

¹[81] Til korleiaren. Etter «Vitnemåls-lilja». Ein miktam, til lærdom. Av David,

²[82] då han låg i strid med aramearriket mellom elvane og aramearriket i Soba, og Joab kom att og slo tolv tusen edomittar i Saltdalen.

³ Gud, du har støytt oss bort og knust oss. Du var harm. Reis oss opp att!

⁴Du lét landet skjelva og rivna. Læk brestene, for landet vaklar.

⁵ Du lét folket ditt sjå harde tider, gav oss vin så vi tumla.

⁶Du reiste ei fane for dei som fryktar deg. Dit kan dei rømma for bogen. Sela

⁷ Hjelp oss med di høgre hand, svar meg, så dine kjære kan bli berga.

⁸ [83] Gud har tala i sin heilagdom: «Med jubel vil eg dela ut Sikem, Sukkot-dalen vil eg måla opp.

⁹ Mitt er Gilead og mitt er Manasse, Efraim er hjelmen på mitt hovud, Juda er min styrarstav.

¹⁰Men Moab er mitt vaskefat, på Edom kastar eg sandalen. Hyll meg, Filistarland!»

¹¹Kven fører meg til festningsbyen, kven leier meg til Edom?

¹² Det er du, Gud, du som støytte oss bort og ikkje drog ut med våre hærar.

¹³ Støtt oss mot fienden! Hjelp frå menneske er ingenting verd.

¹⁴ I Gud skal vi gjera storverk. Han skal trakka ned våre fiendar.