Read nynorsk 2011 Salmane 65 Bible Online

Salmane 65 - nynorsk 2011 bible

Salmane 65

¹Til korleiaren. Ein salme av David. Ein song.

² Lovsongen høyrer deg til, Gud, på Sion, for deg skal lovnader oppfyllast,

³du som høyrer bøner, til deg kjem alle menneske.

⁴ Når vår skuld blir for sterk for oss, tilgjev du våre brot.

⁵ [86] Sæl er den som du vel ut og tek inn til deg så han får bu i føregardane dine. Vi vil metta oss med det gode i ditt hus, med det heilage i ditt tempel.

⁶ Med skremmande gjerningar svarar du oss i rettferd, Gud, vår frelsar. Alle verdsens endar og det yttarste havet stolar på deg.

⁷Du reiste fjella med di kraft, du var kledd med velde.

⁸ Du døyvde det brusande havet, bølgjebruset og ståket av folka.

⁹ [87] Dei som bur lengst unna, blir gripne av frykt ved dine teikn. Ved morgonens og kveldens portar skaper du jubel.

¹⁰ Du gjestar jorda og lèt henne drikka djupt, du gjer henne overdådig rik. Guds bekk er full av vatn, du sørgjer for kornet, ja, såleis sørgjer du for henne.

¹¹ Du vatnar fòrene, jamnar plogveltene, med regnskurer gjer du jorda mjuk, du velsignar hennar grøde.

¹² Du kronar året med dine gode gåver, spora dine flyt over av rikdom,

¹³beita i øydemarka flyt over, haugane smykkar seg med jubel.

¹⁴Markene kler seg med sauer, dalane sveiper seg i korn. Dei ropar av glede, dei syng.