Read nynorsk 2011 Salmane 66 Bible Online

Salmane 66 - nynorsk 2011 bible

Salmane 66

¹Til korleiaren. Ein song. Ein salme. Rop med jubel for Gud, all jorda!

² Spel og syng til ære for hans namn, gjev han pris og ære!

³ Sei til Gud: «Kor skremmande dine gjerningar er!» Fienden kryp for di store makt.

⁴Heile jorda skal bøya seg for deg, dei skal spela for deg og lovsyngja ditt namn. Sela

⁵ Kom og sjå alt Gud har gjort, skremmande er hans gjerningar mellom menneska.

⁶ Han gjorde sjø til tørt land, gjennom elva gjekk dei til fots. Difor gleder vi oss over han.

⁷ Han herskar med velde til evig tid, hans auge granskar folkeslag. Ingen opprørar skal reisa seg. Sela

⁸De folk, velsign vår Gud! Lat lovsongen lyda for han.

⁹ Han held oss i live og lèt ikkje våre føter vakla.

¹⁰ For du har prøvd oss, Gud, reinsa oss som dei reinsar sølv.

¹¹Du lét oss gå i garnet, du la ei bør av motgang på våre hofter.

¹² Du lét menneske ri over våre hovud, vi gjekk gjennom eld og vatn. Så førte du oss ut til overflod.

¹³ Eg kjem med brennoffer til ditt hus, eg vil halda det eg lova deg,

¹⁴det leppene tala, det munnen sa då eg var i naud.

¹⁵Eg gjev deg feite dyr som brennoffer saman med røyken av vêrar. Eg ofrar både oksar og bukkar. Sela

¹⁶Kom og høyr, alle de som fryktar Gud, eg skal fortelja kva han har gjort mot meg.

¹⁷Min munn ropa til han, på tunga var det lovsong.

¹⁸ Hadde eg urett i sinne, ville Herren ikkje ha høyrt meg.

¹⁹Men Gud har høyrt! Han vende øyret til mi bøn.

²⁰Velsigna er Gud. Han la ikkje mi bøn til side og tok ikkje frå meg si miskunn.