Read nynorsk 2011 Salmane 68 Bible Online

Salmane 68 - nynorsk 2011 bible

Salmane 68

¹Til korleiaren. Av David. Ein salme. Ein song.

² Gud skal reisa seg, hans fiendar bli spreidde, dei som hatar han, skal rømma for han.

³ Slik røyk driv bort, skal du driva dei bort. Slik voks må smelta for elden, går dei urettferdige til grunne for Gud.

⁴Men dei rettferdige skal gleda seg, fryda seg for Guds andlet og jubla av glede.

⁵ Syng for Gud! Lovsyng hans namn! Rydd veg for han som rid gjennom øydemark! HERREN er hans namn. Jubla for han!

⁶ Gud i sin heilage bustad er far for farlause, forsvarar for enkjer.

⁷ Gud lèt einsame finna ein heim, han fører fangar ut til lukke og trivsel, men opprørarar må bu i eit audt og avsvidd land.

⁸ Gud, då du drog ut framfor folket ditt, då du skreid fram gjennom ørkenen, Sela

⁹ då skalv jorda, og det draup frå himmelen for Gud, Sinais Gud, Israels Gud.

¹⁰Du lét regnet strøyma, Gud, ditt utarma land gav du styrke.

¹¹Der fekk flokken din slå seg ned. Gud, du sørgde for dei hjelpelause, for du er god.

¹² Herren sender ut eit ord, stor er skaren av kvinner som kjem med gledebod:

¹³ «Kongar over hærar flyktar, dei flyktar! Kvinnene heime deler bytte.

¹⁴Sjølv til dykk som låg mellom sauene, er det duevenger dekte med sølv, vengefjører av grønt gull.

¹⁵ [89] Då Den veldige spreidde kongane, snødde det på Salmon-fjellet.»

¹⁶Basan-fjellet er eit gudefjell, Basan-fjellet med høge tindar.

¹⁷ Høge tindar, kvifor ser de skeivt til fjellet som Gud ville ha til bustad, der HERREN vil bu for alltid?

¹⁸ Guds vogner er ti tusen gonger tusen, Herren er mellom dei, heilag som på Sinai.

¹⁹ Du steig opp i det høge, førte bort fangar, tok gåver blant menneska, jamvel opprørarar, så du kunne bu der, HERRE og Gud.

²⁰ Velsigna er HERREN dag etter dag! Gud er vår redning, han ber oss. Sela

²¹ Vår Gud er ein Gud som frelser, hos GUD Herren er det utveg frå døden.

²² Men Gud knuser hovudet på sine fiendar, den hårete skallen på dei som stadig lever i skuld.

²³ Herren seier: «Eg fører deg tilbake frå Basan, eg fører deg tilbake frå havsens djup,

²⁴så foten din kan vassa i blod og tunga til hundane dine få sin del av fienden.»

²⁵Folk har sett ditt festtog, Gud, festtoget til min Gud og konge i hans heilagdom.

²⁶Songarar går føre, bak går dei som spelar harpe, i midten unge jenter som slår på tromme.

²⁷ Lovpris Gud, kor mot kor, lov HERREN, de som er av Israels kjelde!

²⁸Der er Benjamin, den yngste, som herskar over dei, Judas hovdingar i flokk og hovdingane i Sebulon og Naftali.

²⁹Gud, vis din styrke, vis deg sterk, Gud, slik vi før har sett.

³⁰ Fordi ditt tempel ragar over Jerusalem, kjem kongar til deg med gåver.

³¹ [90] Du skal truga villdyret i sivet, flokken av oksar og kalvane til folka! Trakk ned dei som traktar etter sølv, sprei folk som vil strid!

³² [91] Dei skal koma med bronse frå Egypt, i hast strekkjer Kusj hendene mot Gud.

³³Syng for Gud, de kongerike på jorda, syng og spel for Herren, Sela

³⁴ for han som rid på himmelen, den eldgamle himmelen. Høyr, han lyfter si røyst, ei mektig røyst!

³⁵Gjev Gud makt! Han har herrevelde over Israel, hans makt når til skyene.

³⁶ Frå sin heilagdom vekkjer Gud frykt. Israels Gud gjev kraft og styrke til folket. Velsigna er Gud!