Read nynorsk 2011 Salmane 7 Bible Online

Salmane 7 - nynorsk 2011 bible

Salmane 7

¹[11] Ein sjiggajon av David. Han song han for HERREN på grunn av benjaminitten Kusj.

² HERRE, min Gud, eg søkjer tilflukt hos deg. Frels meg og berg meg frå alle som jagar meg.

³ Lat dei ikkje riva meg sund som løver og dra meg bort utan at nokon bergar meg.

⁴ HERRE, min Gud, om eg har fare slik fram at det er urett i mine hender,

⁵om eg har gjort vondt mot min ven og rana min motstandar utan grunn,

⁶så lat fienden jaga meg og nå meg att, trakka mitt liv til jorda og kasta mi ære i støvet. Sela

⁷ Reis deg, HERRE, i din vreide, stå opp mot fiendane som rasar mot meg! Vakna, min Gud, du som stemner til doms.

⁸Lat folka samla seg kring deg, ta ditt sete over dei i det høge!

⁹ HERREN dømmer folka. Gjev meg min rett, HERRE, for eg er rettferdig og heil i mi ferd.

¹⁰ Gjer ende på vondskapen til dei som gjer urett, men lat den rettferdige bli ståande, du som prøver hjarte og nyrer, du rettferdige Gud.

¹¹ Gud er mitt skjold, han frelser dei ærlege av hjartet.

¹² Gud er ein rettferdig dommar, ein Gud som alltid kan bli harm.

¹³ Dersom nokon ikkje vender om, vil han kvessa sverdet, spenna bogen og sikta,

¹⁴gjera sine drepande våpen klare og setja fyr på sine piler.

¹⁵ Sjå, den som er svanger med urett, har avla ugjerning og føder løgn.

¹⁶ Eit hòl grev han, og han gjer det djupt, men fell sjølv ned i den grava han grov.

¹⁷ Hans ugjerning råkar hans eige hovud, sin eigen råskap får han i skallen.

¹⁸Eg vil prisa HERREN for hans rettferd, lovsyngja namnet til HERREN, Den høgste.