Read nynorsk 2011 Salmane 71 Bible Online

Salmane 71 - nynorsk 2011 bible

Salmane 71

¹ Hos deg, HERRE, søkjer eg tilflukt, lat meg aldri bli til skamme!

²Berg meg og fri meg ut i di rettferd, vend øyret til meg og frels meg!

³ Ver meg eit vern og eit berg dit eg alltid kan koma! Du har sagt at du vil frelsa meg, du er mitt fjell og mi borg.

⁴ Fri meg, Gud, frå handa til dei lovlause, frå grepet til dei som fer med urett og vald!

⁵Du er mi von, min Herre og GUD, mi trøyst frå eg var ung.

⁶ Frå eg vart fødd, har eg stødd meg til deg, frå mors liv er du min styrke. Eg vil alltid prisa deg.

⁷Eg har vorte til eit teikn for mange, du er mi tilflukt og mitt vern.

⁸Min munn er full av lovsong, eg syng om din herlegdom dagen lang.

⁹ Kast meg ikkje bort i alderdoms år, forlat meg ikkje når kreftene tek slutt!

¹⁰ Fiendane mine talar om meg, dei som står meg etter livet, held råd.

¹¹ Dei seier: «Gud har forlate han. Jag han og grip han! Det er ingen som bergar han.»

¹² Ver ikkje langt borte frå meg, Gud. Min Gud, skund deg og hjelp meg!

¹³ Lat dei som set fram klagemål mot meg, bli til skamme og gå til grunne. Lat dei som søkjer mi ulukke, bli dekte av vanære og skam!

¹⁴Men eg vil alltid venta med von, eg vil leggja min lovsong til all lovsong du får.

¹⁵ Min munn skal fortelja om di rettferd, dagen lang om di frelse, endå dine gjerningar ikkje kan teljast.

¹⁶Eg vil tala om Herren GUDS storverk, forkynna di rettferd, di åleine.

¹⁷Gud, frå eg var ung, har du lært meg opp. Framleis fortel eg om dine under.

¹⁸ Gud, forlat meg ikkje sjølv når eg blir gammal og grå, lat meg tala om di kraft til heile den slekta som kjem. Ditt velde

¹⁹ og di rettferd, Gud, når til det høgste. Du som har gjort så store ting, Gud, kven er som du?

²⁰ Trengsler og ulukker lét du meg sjå, men du vekkjer meg til liv på nytt, og du lyfter meg opp att frå djupa under jorda.

²¹Gjev meg min stordom tilbake, vend deg til meg og trøyst meg!

²² Så vil eg prisa deg til harpespel, prisa din truskap, min Gud. Eg vil syngja for deg og spela på lyre, du Israels Heilage.

²³ Når eg spelar for deg, skal leppene mine jubla, mi sjel som du har fria ut.

²⁴Også tunga mi skal tala dagen lang om di rettferd. For dei som vil meg vondt, har vorte til skamme og til spott.