Read nynorsk 2011 Salmane 74 Bible Online

Salmane 74 - nynorsk 2011 bible

Salmane 74

¹Ein læresalme av Asaf. Gud, kvifor har du støytt oss bort for alltid? Kvifor flammar din vreide mot dei du gjeter?

² Kom i hug flokken du vann deg i gammal tid, din eigen stamme som du fria ut, Sion-fjellet der du slo deg ned.

³ Gå opp til ruinen som ligg knust for alltid! I heilagdomen har fienden øydelagt alt.

⁴Motstandarane brølte der du samlar ditt folk. Sine eigne hærmerke sette dei opp.

⁵Det var som når ein lyfter øksar i tjukke skogen.

⁶Slik slo dei sund alt det utskorne med øks og med brekkstong.

⁷ Dei sette eld på din heilagdom, dei vanhelga og reiv ned staden der namnet ditt bur.

⁸Dei tenkte: «Vi underkuar dei alle saman!» Dei brende alle Guds samlingsstader i landet.

⁹ Vi ser ikkje våre eigne merke. Profetar finst ikkje lenger. Ingen hos oss veit kor lenge dette skal vara.

¹⁰Kor lenge, Gud, skal fienden spotta? Skal motstandaren forakta ditt namn for alltid?

¹¹Kvifor held du høgre handa tilbake? Lyft handa frå fanget og gjer slutt på dette!

¹² Men Gud, min konge frå gammal tid, du som gjer frelsesverk på jorda,

¹³ du kløyvde havet med di makt og krasa hovuda til uhyra i vatnet.

¹⁴ [99] Du slo sund hovuda til Leviatan og gav han til føde for folket i ørkenen.

¹⁵ Du braut veg for kjelder og bekker, du tørka ut mektige elvar.

¹⁶ Din er dagen, og di er natta, du sette himmellysa og sola på plass.

¹⁷Du fastsette alle grenser på jorda, sommar og vinter er det du som har skapt.

¹⁸Hugs dette: Fienden spottar HERREN, eit folk av dårar foraktar ditt namn.

¹⁹Gjev ikkje turteldua di til villdyr, gløym aldri dine armingars liv!

²⁰ Vend blikket mot di pakt! Landet er fullt av mørke stader der valden bur.

²¹Lat ikkje den undertrykte gå bort med skam, lat dei fattige og hjelpelause prisa ditt namn!

²² Reis deg, Gud, og før di sak! Hugs at du blir spotta av dårar dagen lang.

²³Gløym ikkje ropet frå dine fiendar, larmen som alltid stig frå dei som står deg imot.