Read nynorsk 2011 Salmane 77 Bible Online

Salmane 77 - nynorsk 2011 bible

Salmane 77

¹[104] Til korleiaren. Etter Jedutun. Av Asaf. Ein salme.

² Eg ropar til Gud, eg skrik. Eg ropar til Gud, og han høyrer meg.

³ [105] Den dagen eg er i naud, søkjer eg Herren. Om natta retter eg handa ut, ho trøytnar ikkje. Mi sjel lèt seg ikkje trøysta.

⁴Eg tenkjer på Gud og sukkar, eg grublar, og mi ånd veiknar. Sela

⁵Du held auga mine opne, eg er uroleg, eg kan ikkje tala.

⁶ Eg tenkjer på gamle dagar, minnest framfarne år.

⁷Om natta tenkjer eg på dette, hjartet grublar, ånda granskar.

⁸ Vil Herren støyta oss bort for alltid og ikkje lenger vera god mot oss?

⁹ Er hans miskunn slutt for evig, er ordet hans borte for alle slekter?

¹⁰Har Gud gløymt å vera nådig, har han late att hjartet i vreide? Sela

¹¹Eg seier: «Dette plagar meg: høgre handa til Den høgste er ikkje lenger den same.»

¹²Eg minnest HERRENS verk, minnest dine under frå gammal tid.

¹³Eg grundar på alt du gjorde, og grublar over dine storverk.

¹⁴ Gud, i heilagdom går du fram. Kven er ein gud så stor som vår Gud?

¹⁵Du er den Gud som gjer under, mellom folka lèt du di makt bli kjend.

¹⁶ Med sterk arm løyste du folket ditt ut, sønene til Jakob og Josef. Sela

¹⁷ Vatnet såg deg, Gud, vatnet såg deg og skalv, det store djupet bivra.

¹⁸Skyene auste ut vatn, det torna frå tunge skyer, pilene dine lynte att og fram.

¹⁹Di torerøyst rulla i stormen, lyna lyste opp verda. Jorda riste og skalv.

²⁰ Din veg gjekk gjennom sjøen, din stig gjennom veldige vatn. Ingen kjende dine fotspor.

²¹ Ved handa til Moses og Aron førte du folket ditt som ein flokk med sauer.