Read nynorsk 2011 Salmane 79 Bible Online

Salmane 79 - nynorsk 2011 bible

Salmane 79

¹Ein salme av Asaf. Gud, folka har trengt seg inn på din eigedom. Dei har gjort ditt heilage tempel ureint og lagt Jerusalem i røys.

² Lika av tenarane dine har dei gjeve til føde for himmelens fuglar og kjøtet av dine trugne til villdyra på jorda.

³Dei har aust ut blodet deira som vatn omkring Jerusalem, og det er ingen som gravlegg dei.

⁴ Vi har vorte til hån for grannane, til spott for dei som bur omkring oss.

⁵ Kor lenge, HERRE? Vil du vera harm for alltid? Kor lenge skal din lidenskap brenna som eld?

⁶ Aus vreiden ut over folkeslag som ikkje kjenner deg, over kongerike som ikkje kallar på ditt namn.

⁷ [110] For dei har slukt Jakob og lagt hans bustad i øyde.

⁸Tilrekna oss ikkje gamle synder! Skund deg, lat di medkjensle møta oss! For vi er langt nede.

⁹Hjelp oss, Gud, vår frelsar, så namnet ditt blir æra! Fri oss ut og tilgjev våre synder for ditt namn skuld.

¹⁰ Kvifor skal folka seia: «Kvar er deira Gud?» Lat våre auge sjå og folka kjenna at du hemnar blodet frå dine tenarar.

¹¹ Lat sukket frå fangane nå deg; din arm er sterk, spar dei som skulle døy!

¹²Herre, gjev grannane våre tilbake i fanget sju gonger den spotten dei rette mot deg.

¹³ Men vi er ditt folk, den flokken du gjeter. Vi vil lova deg til evig tid, lovprisa deg frå slekt til slekt.