Read nynorsk 2011 Salmane 80 Bible Online

Salmane 80 - nynorsk 2011 bible

Salmane 80

¹[111] Til korleiaren. Etter «Liljene». Eit vitnemål. Av Asaf. Ein salme.

² Lytt, du Israels gjetar, du som fører Josef lik ein flokk med sauer. Du som tronar over kjerubane, strål fram!

³ [112] Vekk di kraft for Efraim, Benjamin og Manasse, kom oss til hjelp!

⁴ [113] Gud, før oss tilbake, lat ditt andlet lysa så vi blir frelste!

⁵Gud HERRE Sebaot, kor lenge skal du svara folket si bøn med rykande vreide?

⁶Tårebrød gjev du dei å eta, og tårer må dei drikka til overmål.

⁷ Du lèt grannane våre slåst om oss, fiendane spottar oss.

⁸Gud Sebaot, før oss tilbake, lat ditt andlet lysa så vi blir frelste!

⁹ [114] Ein vinstokk tok du frå Egypt, du dreiv folkeslag ut og planta han.

¹⁰Du rydda plass for han så han slo rot og fylte landet.

¹¹Fjell vart dekte av skuggen, mektige sedrar av greinene.

¹² [115] Han strekte rankene ut til havet og renningane til Storelva.

¹³ Kvifor har du rive ned gjerdet rundt han så alle som går framom, kan plukka,

¹⁴villsvin frå skogen kan gnaga og krypet på marka kan eta?

¹⁵ Vend attende, Gud Sebaot, skoda ned frå himmelen og sjå! Ta deg av denne vinstokken,

¹⁶ det du har planta med di høgre hand, sonen som du sjølv har gjeve styrke!

¹⁷Treet er brent opp i elden, hogge av. Dei skal gå til grunne når du trugar.

¹⁸ Hald di hand over han som er ved di høgre side, over mennesket som du sjølv har gjeve styrke,

¹⁹så vil vi aldri trekkja oss bort frå deg. Vekk oss til liv att, så vil vi kalla på ditt namn!

²⁰Gud HERRE Sebaot, før oss tilbake, lat ditt andlet lysa så vi blir frelste!