Read nynorsk 2011 Salmane 81 Bible Online

Salmane 81 - nynorsk 2011 bible

Salmane 81

¹[116] Til korleiaren. Etter Gittit. Av Asaf.

²Bryt ut i jubel for Gud, vår styrke, rop av glede for Jakobs Gud!

³ Stem opp ein song, lat handtromma lyda, den yndige lyra saman med harpa.

⁴ Blås i horn ved nymåne og ved fullmåne, på vår høgtidsdag.

⁵For det er ei forskrift i Israel, ei lov frå Jakobs Gud.

⁶ [117] Han gjorde det til eit lovbod i Josef då han drog ut frå Egypt. Eg høyrer eit språk eg ikkje kjende:

⁷ Eg fria hans aksel frå børa, hendene slapp å bera korga.

⁸ I trengsle ropa du, og eg fria deg ut; løynd i toreskya svara eg deg, ved Meriba-kjelda prøvde eg deg. Sela

⁹ Høyr, mitt folk, eg formanar deg! Israel, om du berre ville høyra på meg!

¹⁰ Ingen framand gud må finnast hos deg, du skal ikkje bøya deg for gudar frå framande land!

¹¹Eg er HERREN din Gud som førte deg opp frå Egypt. Lat opp munnen, så fyller eg han!

¹²Men folket mitt høyrde ikkje på meg, Israel ville ikkje lyda meg.

¹³Så lét eg dei fara, forherda i hjartet; dei følgde sine eigne planar.

¹⁴ Gjev mitt folk ville høyra på meg, gjev Israel ville gå på mine vegar!

¹⁵Då skulle eg kua motstandarane deira med det same og retta handa mot fienden.

¹⁶Dei som hatar HERREN, må krypa for han, deira ulukketid skal alltid vara.

¹⁷ Men han har late Israel eta den beste kveiten. Eg mettar deg med honning frå berget.